Skilar 35 megavöttum og greiðir 2 milljarða króna

Rio Tinto Alcan mun greiða Landsvirkjun 17 milljónir dollara, liðlega tvo milljarða króna, í bætur og skila til baka 35 megavöttum af raforku, samkvæmt samkomulagi sem fyrirtækin skýrðu frá nú síðdegis. Ástæðan er sú að sextíu milljarða króna verkefni til að auka afköst álversins í Straumsvík tókst ekki sem skyldi og því hefur álverið ekki þörf fyrir alla raforkuna.

Bæturnar greiðir Rio Tinto Alcan vegna kostnaðar sem það hafði í för með sér fyrir Landsvirkjun að reisa Búðarhálvirkjun fyrr en þörf krafði. Samkomulagið þýðir að Landsvirkjun fær nú afgangsorku sem nemur aflþörf eins kísilvers, sem hún getur nú boðið öðrum til kaups.

Nánar má lesa um samkomulagið í sameiginlegri fréttatilkynningu félaganna. Í henni er með svohljóðandi hætti vitnað í forstjóra þeirra: 

Hörður Arnarson, forstjóri Landsvirkjunar: „Landsvirkjun fagnar samkomulaginu, en með því er greitt úr ófyrirséðum vandamálum sem upp komu við fjárfestingarverkefni Rio Tinto Alcan. Samkomulagið grundvallast á langvarandi viðskiptasambandi fyrirtækjanna sem og virðingu fyrir gagnkvæmum viðskiptahagsmunum." 



Rannveig Rist, forstjóri Rio Tinto Alcan á Íslandi: „Við erum stolt af því að hafa staðið að langstærsta fjárfestingarverkefni á Íslandi á undanförnum árum, í því skyni að framleiða verðmætari afurðir, auka rekstraröryggi, efla mengunarvarnir og auka framleiðsluna. Þetta hefur skapað yfir 1.000 ársverk á tímum þegar íslenskt efnahagslíf þurfti hvað mest á þeim að halda. Samkomulagið við Landsvirkjun er enn ein staðfesting þess að viðskiptasamband áliðnaðar og orkuframleiðslu á Íslandi einkennist af gagnkvæmri virðingu og gagnkvæmum ávinningi."