Varað við eldhættu vegna þurrka

SMS voru send út frá Almannavörnum til þeirra sem staddir eru í Skorradal í dag til þess að vara við eldhættu vegna þurrka.

Þurrkatíð hefur verið að undanförnu og því gróður og sina orðin ansi þurr í Skorradal eftir því sem fréttastofa kemst næst. Fjölmenn sumarhúsabyggð er í Skorradal og þar er einstaklega gróðursælt.

Í fyrra var töluvert fjallað um mögulega eldhættu og lýstu Almannavarnir meðal annars yfir óvissustigi á Vesturlandi vegna hættu á gróðurelda eftir mikinn þurrk síðastliðið sumar.

Sérstök hætta þykir á skógareldum í Skorradal þar sem dalurinn er þröngur, byggðin þröng, mikið kjarr auk þess sem að flóttaleiður úr dalnum eru þröngar.