Spennandi að sjá hvernig þetta fer hjá Frökkunum

„Ég veit ekki hvað skal segja, það er auðvitað margt sniðugt við þetta hjá Frökkunum en þeir eru að bregðast við almennu ástandi í menningu sem hefur litið á það sem sjálfsagðan hlut að neyta áfengis daglega," segir Einar Magnús Magnússon, hjá Umferðarstofu, aðspurður hvort að það væri mögulegt fyrir Íslendinga að taka upp sömu lög og Frakkar gera þann 1. júlí næstkomandi. Þá verður öllum ökumönnum í landinu skylt að hafa áfengismæla í bílum sínum.

Einar Magnús segir að hér á landi séu háværar kröfur uppi um að þeir einstaklingar sem hafa gerst sekir um ölvunarakstur verði skylt að vera með alkóhóllás í bílum sínum eins og tíðkast fleiri Evrópulöndum. Frakkar hafa þó ekki farið þá leið að sinni heldur ætla þeir að skylda alla til að hafa viðurkenndan áfengismæli í bíl sínum, eins mæli og lögreglan er með.

Mörkin lækka bráðlega

„Það er meira til þess að hver og einn ökumaður standi vörð um sjálfan sig. Þetta gæti gengið í einhverjum löndum þar sem mörkin eru hærri en hér. Það fer eftir því hvenær refsimörkin fara að „kikka" inn. Ef svona lagað væri tekið upp á Íslandi þurfum við að hafa í huga að í fyrirliggjandi frumvarpi um umferðarlög er gert ráð fyrir að refsimörkin verði færð miklu neðar, eða úr 0,5 prómillum niður í 0,2 prómill," segir hann.

Og hann segir að ef lög líkt og í Frakklandi yrðu tekin upp hér á landi þyrfti að vekja athygli á því að allur akstur undir áhrifum áfengis er ávísun á hættu og í raun bannaður. „Og ef það kæmi einhver smá mæling inn á svona tæki, þá þyrfti ég ökumaðurinn að taka leigubíl eða strætó. Þetta er á margan hátt mjög athyglisvert og það verður mjög spennandi að sjá hvernig þetta fer hjá Frökkunum."

Hægt að kaupa áfengismæla hér á landi

Á Íslandi geta ökumenn keypt áfengismæla af mismunandi gæðum, en Einar Magnús segir að þrátt fyrir að ökumaður sé undir mörkunum þýði það ekki endilega að hann megi keyra. „Ég bið menn sem blása í svona mæli að hafa þetta í huga. Ef þú blæst í svona mæli og hann sýnir 0,4 prómill, sem er undir refsimörkum, og lögreglan stöðvar þig svo þá setur hún þig í tímabundið akstursbann. Það er alltaf bannað að aka undir áhrifum áfengis þó þú sért undir mörkunum, það er bara ekki um refsingu í formi sektar að ræða. Refsingin gæti hinsvegar verið sú að þú veldur slysi og um það eru ótal dæmi. "