Lítið útstreymi aflandskróna

Aflandskrónustabbinn hefur lækkað um 12 milljarða króna frá því að gildi tóku ný lög í byrjun marsmánaðar sem fela í sér losun fjármagnshafta á aflandskrónueigendur. Staða af­lands­króna stendur núna í um 72 milljörðum, eða sem nemur 2,6 prósentum af landsframleiðslu.

Frá þessu er greint í nýrri greinargerð fjármála- og efnahagsráðuneytisins um framgang áætlunar um losun hafta en þar segir: „[L] osun takmarkana á aflands­krónueignir hefur ekki leitt til verulegs útstreymis gjaldeyris frá landinu.“ Þá hafi hluti lækkunarinnar þegar streymt aftur til landsins.

Þannig nam hreint innflæði fjármagns ríkisskuldabréfa í marsmánuði samtals tíu milljörðum króna í kjölfar lækkunar bindiskyldunnar niður í núll prósent í byrjun þess sama mánaðar. Til samanburðar var hreint innflæði fjármagns í ríkis­skuldabréf aðeins einn milljarður á öllu árinu 2018.