Anderton leggur skóna á hilluna

Darren Anderton hefur tilkynnt að hann mun leika sinn síðasta leik þegar að hans lið, Bournemouth, mætir Chester í ensku C-deildinni á laugardag.

Það varður 569. leikur Anderton á ferlinum en hann er 36 ára gamall. Alls á hann 30 landsleiki að baki og hefur leikið með Portsmouth, Tottenham, Birmingham og Wolves á sínum ferli.

„Það var afar erfitt að taka þessa ákvörðun og laugardagurinn verður sorgardagur," sagði hann í samtali við enska fjölmiðla.

Hann lék lengst af með Tottenham eða í tólf ár, frá 1992 til 2004. Á þeim tíma lék hann 305 leiki með félaginu og skoraði í þeim 37 mörk.

Anderton spilaði stórt hlutverk með enska landsliðinu á EM 1996 þar sem liðið komst í undanúrslit keppninnar, þrátt fyrir að hann hafi misst af stærsta hluta tímabilsins á undan vegna meiðsla.

Hann var einnig í landsliðshópi Englands á HM 1998 í Frakklandi en Glenn Hoddle sagði þá að hann teldi Anderton jafn góðan og Beckham þegar kæmi að fyrirgjöfum. Þar að auki væri Anderton betri varnarmaður.

Anderton missti þó af EM 2000 vegna meiðsla en lék svo sinn síðasta landsleik gegn Svíum árið 2001.