Björgólfur Thor segist eiga hraðametið í peningatapi

„Ég á hraðametið í peningatapi,“ segir Björgólfur Thor Björgólfsson fjárfestir í viðtali við helgarblað breska blaðsins Times sem kom út nú um helgina. Í viðtalinu lýsir hann því hvernig hann tapaði yfir þremur milljörðum punda, um 500 milljörðum íslenskra króna, á aðeins þremur dögum í bankahruninu.

Í viðtalinu segir að þegar Björgólfur hafi farið að sofa föstudaginn 3. október 2008 hafi hann verið gríðarlega ríkur en aðeins þremur dögum síðar hafi hann tapað nánast öllu þegar Landsbankinn, sem var í eigu Björgólfs Thors, hrundi í október 2008.

Einnig kemur fram í viðtalinu að Björgólfur búi nú í London og sjö árum eftir að hann tapaði öllu hafi honum tekist að auðgast á nýjan leik og að eignir hans séu metnar á um millljarð punda.