Ronaldo næstum farinn til Arsenal

Cristiano Ronaldo hefur greint frá því að hann var nálægt því að fara til Arsenal áður en hann gekk til liðs við Manchester United.

Ronaldo kom til United frá Sporting Lissabon árið 2003 fyrir tólf milljónir punda.

En Ronaldo hefur greint frá því að hann fundaði þrívegis með Arsene Wenger, stjóra Arsenal, á sínum tíma og að hann hafi verið hársbreidd frá því að semja við Arsenal.

Þetta kemur fram í viðtali við hann í France Football sem krýndi hann á dögunum knattspyrnumann Evrópu.

„Ég ber mikla virðingu fyrir Wenger. Hann er mjög gáfaður maður," sagði Ronaldo.

Jorge Mendes, umboðsmaður Ronaldo, sagði að fleiri félög hafi verið á eftir Ronaldo, svo sem Real Madrid, Juventus og Barcelona.

„En það voru aðeins United og Arsenal sem vildu fá hann strax. Hin liðin vildu að hann yrði áfram hjá Sporting í eitt ár til viðbótar," sagði Mendes.