Ekki fallist á endurupptöku shaken baby-máls

Hæstiréttur féllst í dag á kröfu saksóknara um að vísa frá endurupptöku á hinu svokallaða „shaken baby“-máli. Kostnaður var greiddur alfarið úr ríkissjóði. Verjandi ákærða segir miður að ekki fáist efnisleg niðurstaða í málið. Hann hefur ekki lagt árar í bát, þrátt fyrir niðurstöðu Hæstaréttar í dag.

Sigurður Guðmundsson fékk 18 mánaða fangelsisdóm í upphafi aldarinnar fyrir að hafa hrist 9 mánaða gamlan dreng, sem hann hafði í daggæslu, með þeim afleiðingum að drengurinn lést.

Fallist var á endurupptöku málsins árið 2015 og vó þar þyngst matsgerð bresks sérfræðings, dr. Waney Squier, sem taldi dánarorsök drengsins óljósa og engin ótvíræð gögn liggja fyrir um högg eða önnur merki um áverka sem hefðu getað orsakast af harkalegum hristingi.

Ákæruvaldið lagði fram tvíþætta frávísunarkröfu, þegar munnlegur málflutningur fór fram þann 30. janúar síðastliðinn, sem hvíldi bæði á form- og efnisgalla á úrskurði endurupptökunefndar. Í fyrsta lagi taldi saksóknari að ákvörðun endurupptökunefndar hafi verið röng á sínum tíma og skilyrði til endurupptöku hafi ekki verið uppfyllt. 

Ekkert nýtt hefði komið fram í máli Dr. Squier, sem þar að auki hafi borið á borð „lítt rökstuddar getgátur“ og brugðist hlutverki sínu sem óhlutdrægur matsmaður. Vitnisburður hennar hafi því ekki verið til þess fallinn að réttlæta endurupptöku.

Ítarlegt viðtal við Sigurð og sambýliskonu hans, Sigrúnu Jónu Sigmarsdóttur, má horfa á hér fyrir neðan. Það var tekið 30. janúar, daginn sem munnlegur málflutningur fór fram í Hæstarétti. Hvorugt þeirra mætti í Hæstarétt í dag.

Í öðru lagi væri það mat ákæruvaldsins að endurupptökunefndin hafi farið út fyrir valdsvið sitt. Með ákvörðun sinni hafi endurupptökunefnd fellt úr gildi fyrri dóm, sem aðeins sé á færi dómstóla. Réttast væri því að vísa málinu frá að mati saksóknara.

Væri málinu ekki vísað frá krafðist saksóknari til vara að dómur héraðsdóms, sem fól í sér sakfellingu fyrir manndráp af gáleysi, yrði staðfestur og að Sigurði yrði gert að greiða allan sakarkostnað.

Verjandi Sigurðar, Sveinn Andri Sveinsson, var að vonum ósammála ákæruvaldinu og fór fram á að Hæstiréttur hafnaði frávísunarkröfunni. Hann rak í löngu máli þá afstöðu sína að engar hlutlausar sannanir hafi verið lagðar fram um að heilkennið, „shaken baby syndrome,“ sé yfirhöfuð til.

Þúsundir leitarniðurstaðna á netinu sýni fram á að fræðimenn takist á um tilvist heilkennisins, auk þess sem það var mat Sveins að vitnisburður Dr. Squire hnekkti niðurstöðum krufningarinnar. Því mætti tvímælalaust flokka faglegt mat hennar sem nýjar upplýsingar og því væri það eina í stöðunni að taka málið upp aftur.

Þegar fréttastofa ræddi við Svein eftir úrskurð Hæstaréttar hafði honum ekki tekist að kynna sér niðurstöðuna ítarlega. Hann gerði þó ráð fyrir að málinu hafi verið vísað frá vegna fyrrnefnds formgalla. Næstu skref verði að setjast yfir niðurstöðuna og kanna hvaða úrræði séu í stöðunni. Það sé ekki loku fyrir það skotið að reynt verði að fara aftur fram á endurupptöku.

Vísir fylgdist með munnlegum málflutningi saksóknara og Sveins Andra fyrir Hæstarétti í lok janúar. Frekari fréttir af málinu má nálgast hér að neðan.

Fréttin hefur verið uppfærð með viðbrögðum Sveins Andra.