Margrét hættir sem formaður Samtaka verslunar og þjónustu

Margrét Sanders, formaður Samtaka verslunar og þjónustu, mun ekki gefa kost á sér til áframhaldandi setu sem formaður samtakanna. Þetta kemur frma í tilkynningu frá SVÞ.

„Margrét hefur verið formaður SVÞ síðan 2014 og hefur margt áunnist á þeim tíma. Ber þar hæst niðurfelling tolla og vörugjalda á árunum 2015-2017. Margrét hefur sett menntun í atvinnulífinu í forgang og er afrakstur þess meðal annars ný og spennandi námsbraut til stúdentsprófs sem hefst í Verslunarskóla Ísland í haust,“ segir í tilkynningunni.

„Í störfum sínum hjá SVÞ hefur Margrét unnið ötullega að því að bæta rekstrarskilyrði einkareksturs í heilbrigðisþjónustu og skólamálum auk þess að víkka út starfsemi þjónustugeirans og tala fyrir auknum útboðum verkefna hjá hinu opinbera til einkaaðila.“

Þá segir að innan SVÞ og Samtaka atvinnulífsins hafi Margrét lagt mikla áherslu að nútímavæða vinnumarkaðinn og auka sveigjanleika vinnutíma til hagsbóta fyrir starfsfólk og atvinnurekendur.

Margrét mun láta af formennsku á aðalfundi SVÞ 14. mars næstkomandi. 

Þóranna K. Jónsdóttir, markaðs- og kynningarstjóri hjá SVÞ, segir engin framboð hafa borist til formennsku enn sem komið er. Frestur til framboðs renni út 21. febrúar.