Mokveiði á urriðaslóðum á Þingvöllum

Urriðaveiðin á ION svæðinu og við Villinavatnsárós hefur farið feyknavel af stað og líklega hefur aldrei veiðst jafnvel í opnun á þessum svæðum.

Við höfum heyrt af veiði frá þeim sem opnuðu ION svæðið en þeirra á meðal voru Jóhannes Hinriksson og Bjarki Már Jóhannsson leiðsögumenn við Ytri Rangá. Þegar við heyrðum í Bjarka um miðjan daginn voru þeir félagar komnir með hátt í 30 fiska og sá stærsti 87 sm. Mest af urriðanum var 65-75 sm en slangur 75-85 sm. Þarna hafa veiðst urriðar sem ná um það bil 100 sm svo til á hverju vori.

Halldór Gunnarsson hjá Flugubúllunni var við Villingavatnsárós ásamt Árna Kristni Skúlasyni og nokkrum öðrum og af fréttum að dæma af þeim félögum voru þeir komnir með 14 væna urriða um hádegi og þrátt fyrir erfið skilyrði var takan góð. Það virðist vera mikill uppgangur á urriðarveiðum í vatninu og ekkert skrítið að veiðimenn sækist í að setja í einn svona stórann því eins og því hefur verið líst þá er takan þannig að það er eins og að kasta flugu við þjóðveginn og festa hana í mótorhjóli sem fer framhjá á fullri ferð. Hljómar ekkert leiðinlega.