Viðskipti erlent

Norðmenn halda áfram að undirbúa skipagöng

Kristján Már Unnarsson skrifar
Skipagöngin eiga að verða 1,7 kílómetra löng, 37 metrar á hæð yfir sjávarmáli, en 12 metrar undir sjávarmáli, og 36 metrar á breidd.
Skipagöngin eiga að verða 1,7 kílómetra löng, 37 metrar á hæð yfir sjávarmáli, en 12 metrar undir sjávarmáli, og 36 metrar á breidd. Mynd/Stad Skipstunnel
Ríkisstjórnarflokkarnir í Noregi hafa sæst á að bæta andvirði tæplega sjötíu milljónir íslenskra króna inn í fjárlagafrumvarp næsta árs til að halda áfram undirbúningi skipaganga við Stað á vesturströnd Noregs. Við framlagningu frumvarpsins í haust var engin fjárveiting í skipagöngin, sem túlkað var sem yfirlýsing um að ríkisstjórnin ætlaði að slá göngin af. 

Þetta virðist vera endurtekning á því sem gerðist við fjárlagagerðina fyrir ári þegar pólitísk hrossakaup, til að viðhalda lífi norsku ríkisstjórnarinnar, veittu göngunum gálgafrest. Kristilegi þjóðarflokkurinn ákvað þá að skilyrða stuðning sinn við hægristjórn Ernu Solberg því að haldið yrði áfram að undirbúa göngin.

Göngin eru hönnuð til að rúma strandferjur Hurtigruten. Skipafélagið tilkynnti í fyrra að skip þess myndu ekki nota göngin.Grafík/Stad Skipstunnel
Bakslag var þá komið í áform Norðmanna um að grafa fyrstu skipagöng heims. Fjárhagsleg úttekt sýndi fram á að þetta fjörutíu milljarða króna verkefni myndi seint standa undir sér auk þess sem ráðamenn strandferða Hurtigruten lýstu því yfir að ferjur skipafélagsins myndu ekki nota göngin. 

Sjá einnig: Svona sigla skipstjórar inn í fyrstu skipagöng heims 

Þrátt fyrir þennan viðsnúning núna við fjárlagagerðina lýsir verkefnisstjóri skipaganganna, Randi Humborstad, í samtali við NRK, yfir vonbrigðum með að ekki sé gert ráð fyrir byrjunarframlagi til að hefja verkið. Göngin séu fullfjármögnuð á samgönguáætlun og þeim áformum verði að fylgja eftir á fjárlögum. Hún segir að slagurinn verði núna um fjárlagagerðina fyrir árið 2021. 

Staða málsins virðist þannig lítið hafa breyst frá því Stöð 2 fjallaði síðast um það fyrir réttu ári, í frétt sem sjá má hér:


Tengdar fréttir

Norðmenn áforma jarðgöng fyrir skip

Fyrstu jarðgöng veraldar fyrir skip eru nú í undirbúningi í Noregi. Þeim er ætlað að sneiða framhjá einni hættulegustu siglingaleið Evrópu, leiðinni fyrir Stað.

Tvísýnt um skipagöngin sem þykja dýr fyrir norska ríkið

Bakslag er komið í áform Norðmanna um að grafa fyrstu skipagöng heims. Pólitísk hrossakaup til að viðhalda lífi norsku ríkisstjórnarinnar veittu göngunum þó gálgafrest og komu í veg fyrir að þau yrðu slegin af.






Fleiri fréttir

Sjá meira


×