Lögmaður Skúla svarar Sveini Andra fullum hálsi

Lögmaður Skúla Gunnars Sigfússonar segir Svein Andra aldrei hafa viljað sættir í máli Skúla í Subway og ástæðan sé nú komin á daginn: Hann fékk búið í fangið og hefur getað mjólkað það.

„Annað hvort hefur hann ekki lesið úrskurð dómarans eða er viljandi að misskilja hann. Að sjálfsögðu á skiptastjóri rétt á að fá ákveðna þóknun en á því eru takmörk – þak,“ segir Heiðar Ásberg Atlason lögmaður og einn eigandi Logos. En, hann er meðal annars lögmaður Skúla Gunnars Sigfússonar sem kenndur hefur verið við Subway.

Sveinn Andri Sveinsson, sem hefur verið skiptastjóri þrotabús félagsins EK1923, sem var birgir fyrir Subway um tíma en Skúli hefur gagnrýnt störf Sveins Andra harðlega og hvergi sparað sig í þeirri gagnrýni.

„Sveinn Andri rukkar rétt um 50 þúsund krónur fyrir hverja klukkustund, þannig að kostnaðurinn við eingöngu hans „vinnu“ er kominn í 120 milljónir króna. Það er meira en til var í búinu. Þóknun hans fyrir meinta vinnu við þetta eina þrotabú nam því 4,5 milljónum króna í hverjum mánuði frá því að honum var úthlutað búinu í september 2016 til ársloka 2018,“ segir í einni greina Skúla um málið.

Segir Svein Andra snúa út úr úrskurði dómarans

Í gær var greint frá því að Sveini Andra var gert að endurgreiða búinu 100 milljónir króna. Sveinn sagði það ekkert mál, í samtali við Vísi, en þetta bæri þó ekki að skilja sem svo að honum bæri ekki þóknun heldur að dómari mæti það svo að formsatriði væri ekki fullnægt.

„Það eina sem dómarinn er að segja með þessari ákvörðun er að ég hefði sem skiptastjóri átt að bóka það skýrar í fundagerð skiptafundar að ég væri að taka þóknun af eignum búsins jafn harðan. Þar sem það var ekki gert þarf ég að endurgreiða þetta. Svo auðvitað greiði ég mér þóknun.“

Þetta telur Heiðar Ásberg makalausa túlkun á úrskurði dómarans. Dómari sé einfaldlega að segja: „Þú ert að rukka alltof mikið og þú ert að gera það vitlaust,“ segir Heiðar Ásberg í samtali við Vísi og telur víst að ef ekki væri svona stutt eftir í að hyllti í málslok, þá hefði Sveinn Andri verið sviptur búinu.

Óbilgirni Sveins Andra nú skiljanleg

Sveinn Andri vék sérstaklega að þætti Heiðars Ásbergs í frétt Vísis í gær og sagði hann „aftan og framan og allt um kring“ í málinu; þá sem lögmaður Skúla og lögmaður kröfuhafa í búið. Heiðar Ásberg segir það þetta dæmigerð viðbrögð fyrir mann sem er í nauðvörn og reynir að snúa vörn í sókn. Með því að afvegaleiða málið.

„Ég hef ekki áhyggjur af því. Það er rétt, ég vinn fyrir Skúla og hef aldrei dregið dul á það. Þetta vita allir kröfuhafarnir og hafa aldrei gert athugasemd við það, nema Sveinn.

Hann er bara að reyna að líta ekki út fyrir að vera ekki eins mikið fífl og hann er,“

segir Heiðar Ásberg. Hann segir að glímuna við Svein Andra í þessu máli hafa verið langa og stranga; einkennst af yfirgengilegri óbilgirni af hálfu Sveins. Heiðar Ásberg segist ítrekað reynt að ná sáttum að siðaðra manna hætti án árangurs. Og rekur þá sögu fyrir blaðamanni þar sem í eru stiklur sem benda til þess að Sveinn hafði aldrei haft engann áhuga á að finna lausn á málinu.

„Hann hélt nú ekki. Hann neitaði að setjast niður og ræða málin, neitaði sáttum og það er að koma á daginn núna af hverju. Hann hafði enga hagsmuni af því, hann er nú kominn með feitan bita í fangið sem hann hefur mjólkað í þrjú ár.“