Keyrðu aftan á bíl, ollu fjögurra bíla slysi og hlupu á brott

Lögreglunni á höfuðborgarsvæðinu barst í gærkvöldi tilkynningu um fjögurra bíla slys á Reykjanesbraut. Ökumaður bílsins sem ók fyrst aftan á annan bíl, og farþegi, hlupu á brott. Sá sem ekið var á fann til eymsla í fótum og höfði og skemmdist einn ljósastaur.

Þetta kemur fram í dagbók lögreglu og virðist sem að lögreglan hafi átt í nógu að snúast í gærkvöldi og í nótt.

Seint í nótt ók ökumaður bíl sínum inn í garð í Kópavogi en sá er grunaður um ölvunarakstur. Þó nokkrir slíkir voru stöðvaðir auk annarra sem grunaðir eru um akstur undir áhrifum fíkniefna. Þá var einn ökumaður stöðvaður á Eiríksgötu í nótt sem grunaður er fyrir akstur undir áhrifum bæði fíkniefna og áfengis. Þar að auki hefur hann ítrekað verið stöðvaður fyrir akstur þó hann hafi verið sviptur ökuréttindum.

Tveir menn voru handteknir í miðbænum á sjötta tímanum í gær vegna ölvunar og ónæðis. Annar var með hótanir og ofbeldi við lögreglumenn. Hinn var til vandræða við fyrirtæki í Ánanaust er grunaður um eignaspjöll, hótanir og fleira.

Þá þurfti að hafa afskipti af tveimur öðrum ölvuðum mönnum á tjaldsvæði í Laugardal skömmu seinna. Þeir voru með ógnandi hegðun og til vandræða, samkvæmt dagbók lögreglu. Seinna um kvöldið þurfti aftur að hafa afskipti af þeim og var annar þeirra handtekinn vegna gruns um eignaspjöll.

Skömmu fyrir fjögur í nótt var maður handtekinn fyrir líkamsárás í miðbænum. Sá mun ekki hafa farið að fyrirmælum lögreglu og reyndi að tálma störf lögregluþjóna. Um fimm leytið barst tilkynning um innbrot í fyrirtæki við Skólavörðustíg. Þar var maður handtekinn á vettvangi.