Ó­þarfi að sjóða neyslu­vatnið

Endurtekin sýnataka úr vatnsbóli Veitna í Grábrókarhrauni hefur leitt í ljós að ekki er e-coli mengun í neysluvatninu.

Í tilkynningu frá Veitum segir að Heilbrigðiseftirlit Vesturlands telji því ekki lengur þörf á að sjóða vatnið.

„Veitusvæðið sem vatnsbólið í Grábrókarhrauni þjónar nær til Borgarness, Bifrastar og Varmalands auk fjölda sumarhúsa og nokkurra lögbýla í Borgarfirði.

Þrátt fyrir þessa góðu niðurstöðu munu Veitur grípa til aðgerða vegna þessa atburðar. Tekin hefur verið ákvörðun um að setja lýsingu á allt vatn er fer frá Grábrókarveitu. Gert er ráð fyrir að hún verði komin upp á næstu vikum. Lýsingin gerir örverur óvirkar og bætir þannig gæði vatnsins en hefur að öðru leyti engin áhrif. Með henni eru líkur á að svona atburður endurtaki sig þverrandi.

Veitur þakka íbúum á veitusvæðinu fyrir skilning og samvinnu. E-coli gerlamengun er alvarlegur atburður og leiki grunur á að hún sé til staðar er ávallt betra að gæta fyllsta öryggis,“ segir í tilkynningunni.