Braut á stúlku á lofti Austur­bæjar­skóla

Karlmaður er sagður hafa brotið gegn stúlkubarni í Austurbæjarskóla í upphafi mánaðar. Hann á að hafa laumað sér inn í skólann meðan á kennslu stóð og dregið stúlkuna, sem er sögð í fimmta bekk, upp á loft með sér. Þar er hann sagður hafa þuklað á stúlkunni, sem tókst þó að sleppa frá manninum og gera starfsliði skólans viðvart.

Að sögn Morgunblaðsins var maðurinn handtekinn fljótlega eftir meint brot sín, rannsókn lögreglu sé á lokastigi en að ekki hafi þó enn verið gefin út ákæra. Barnavernd var kölluð til og á stúlkan að hafa gefið skýrslu í Barnahúsi. Þá á skólastjóri Austurbæjarskóla að hafa sent tölvupóst á foreldra nemenda þar sem því er heitið að starfsmenn verði betur á verði fyrir utanaðkomandi einstaklingum á skólalóðinni.

Rætt er við móður stúlkunnar í Morgunblaðinu sem segir að brot mannsins hafi tekið á stúlkuna, hún hafi þannig fengið martraðir margar nætur í röð. Stúlkan hafi þó fengið alla aðstoð sem hún þurfti og á að hafa „létt óskaplega“ þegar maðurinn, sem sagður er vera fyrrverandi nemandi skólans, var klófestur.

Haft er eftir Ævari Pálma Pálmasyni, lögreglufulltrúa í kynferðisbrotadeild, að málið sé til rannsóknar hjá embættinu og að rannsóknin sé á lokastigi. Búið sé að taka skýrslur af öllum sem koma að málinu en ekki gefa út ákæru. Hann segist þó ekki vilja tjá sig um hvort maðurinn hafi áður komið við sögu lögreglu.