Viðskipti erlent

Telur afar ólíklegt að danskur banki geti boðið upp á neikvæða vexti hér á landi

Berghildur Erla Bernharðsdóttir og Hallgerður Kolbrún E. Jónsdóttir skrifa
Daníel Svavarsson forstöðumaður hagfræðideildar Landsbankans.
Daníel Svavarsson forstöðumaður hagfræðideildar Landsbankans.
Danskur banki býður viðskiptavinum sínum húsnæðislán með neikvæðu vöxtum þannig að lán lántakenda lækka umfram greiðslu. Forstöðumaður hagfræðideilda Landsbankans segir þetta afar sjaldgæft en þetta hafi komið áður fyrir í Danmörku.

Ástæðan sé veikur hagvöxtur á evrusvæðinu. Hann telur að vextir haldi áfram að lækka hér á landi.

Hinn danski Jyske Bank býður viðskiptavinum sínum nú húsnæðislán með -0,5 prósent vöxtum þá er boðið upp á fasta vexti til tíu ára.

Bankinn, sem er sá þriðji stærsti í Danmörku, bendir þó á að lántakendur munu líklega ekki græða mikið með lántökunni, enda þurfi að standa skil á ýmsum lántökugjöldum og öðrum greiðslum, auk þess sem búast má við gengistapi.

Í kynningarherferð sinni fyrir nýju lánin segist Jyske Bank vera fyrsti bankinn í sögunni til að bjóða lán sem þessi. Annar danskur banki, Nordea, hefur jafnframt í hyggju að bjóða upp á húsnæðislán til 20 ára með föstum 0 prósent vöxtum og lán til 30 ára með 0,5 prósent vöxtum.

Lántakandi hjá Jyske Bank mun þurfa að standa skil á mánaðarlegum afborgunum eins og af öðrum lánum. Höfuðstóll lánsins lækkar þó meira en því sem afborguninni nemur.

Daníel Svavarsson forstöðumaður hagfræðideildar Landsbankans segir að þetta hafi áður komið upp í Danmörku en sé afar sjaldgæft. „Þetta tengist því að danski íbúðamarkaðurinn er mjög nátengdur skuldabréfamörkuðum þar í landi.”

„Og nú þegar stýrivexti eru neikvæðir og  ávöxtunarkrafa á ríkispappírum nálgast núll þá fylgja þessir íbúðaskuldabréfapakkar oft og þá getur þetta gerst tímabundið,“ bætir Daníel við.

Ólíklegt að slík lánakjör bjóðist hér á landi

Stýrivextir í Danmörku eru í kringum -0,6 prósent.

„Ástæðan fyrir því er að mjög veikur hagvöxtur á evrusvæðinu og danska krónan er í fastgengi gagnvart evrunni þannig að Danmörk hefur fylgt stýrivaxtaákvörðun evrópska Seðlabankans,“ segir Daníel.

„Þetta er tilraun Seðlabankans til að örva hagkerfið og koma hjólum efnahagslífsins aftur af stað.“

Hann segir afar ólíklegt að danskur banki gæti boðið upp á slík lánakjör hér á landi.

„Kjörin hér á Íslandi taka mið af lánskjörum ríkissjóðs og meðan að vextir á ríkisskuldabréfum eru jákvæðir og mun hærri en í Danmörku er það afar ólíklegt.“

Daníel Svavarsson telur hins vegar að vextir hér á landi haldi áfram að lækka. 


Tengdar fréttir






Fleiri fréttir

Sjá meira


×