Weekday opnuð á Íslandi

Fyrsta útibú tískufatabúðarinnar Weekday verður opnað á fimmtudaginn. Verslunin er í Smáralind. Hönnuðirnir Sigurður Oddsson og Viktor Weisshappel voru fengnir til að hanna boli í tilefni af opnuninni.

Það er vafalaust nokkur tilhlökkun meðal íslenskra tískuspekúlanta yfir opnuninni, enda þessi frábæra viðbót í íslensku tískuflóruna okkur mikið happ. Weekday er starfrækt í níu löndum, en fyrsta búðin hét Weekend, eða Helgi. Hún var stofnuð árið 2000, en þegar á leið var ákveðið að breyta nafninu í Weekday þar sem vinsældirnar ollu því að lengja varð opnunartímann yfir á virka daga.

Fötin frá Weekday eiga það flest sameiginlegt að vera stílhrein og fáguð. Weekday fylgir þó að mestu hugmyndafræði flestra búðanna innan Hennes & Mauritz samsteypunnar sem er að halda verðinu sem hagstæðustu.

Samsteypan rekur einnig verslanirnar H&M, Other stories, Monki og COS. Þær tvær síðastnefndu opna einnig útibú á Íslandi á fimmtudaginn, Monki í Smáralind og COS við Hafnartorg.

Það er því ljóst að eigendur Hennes & Mauritz hljóta að vera sáttir við afkomu, gengi og viðtökur þeirra þriggja H&M verslana sem fyrirtækið hefur nú þegar opnað á landinu.

Í tilefni af opnuninni voru grafísku hönnuðirnir Sigurður Oddsson og Viktor Weisshappel fengnir í samstarf með keðjunni.

Þegar nýtt útibú Weekday er opnað eru fengnir hönnuðir frá því landi, borg eða bæ sem búðin er staðsett í til að gera prent fyrir stuttermaboli. 

Inni í búðinni í Smáralind er sérstakt prentstúdíó þar sem viðskiptavinir geta fengið hönnun þeirra Sigurðar og Viktors á flíkur úr búðinni sem hægt er að prenta á.

Það er algjör nýjung hérlendis að hafa slíkt stúdíó í tískufataverslun.

Flíkur Weekday henta margar vel í slíka prentun, þar sem sniðin og útlitið er oft einfalt og klassískt. Hönnun Sigurðar og Viktors er einungis til sölu yfir opnunarhelgina, en það er í kortunum að hafa prentnámskeið síðar meir þar sem stúdíóið verður notað.

„Bolurinn minn heitir Anda, eins og í andaðu djúpt, en vekur einnig upp hugsanir um andann. Þessi tvöfalda túlkun var hugsuð til að fá fólk til að taka sér smástund og anda djúpt. Að það leyfi sér að lifa í nú-inu“ segir Sigurður. Hann hefur starfað sem grafískur hönnuður og listrænn stjórnandi í um áratug.

Sigurður og Viktor voru beðnir um að hafa skírskotun í hönnun sinni.

„Leturgerðin er fléttuð og flæðandi, innblásin af keltneskum hnútum og „art nouveau“, en mér finnst báðir stílar tengjast náttúrunni sterkum böndum,“ segir Sigurður og bætir við: „Ég vona að þegar fólk sér bolinn að þá taki það sér smá stund og andi djúpt að sér.“

Bolirnir hans Viktors eru innblásnir af íslenska veðrinu og kallast: Sea of fun and the damn cloud.

„Íslendingar tala mikið um veðrið. Það breytist hratt og er mjög óútreiknanlegt. Það er vægt til orða tekið að segja að veðurfarið hafi gífurleg áhrif á skaplyndi og líðan fólks,“ segir Viktor. Hann starfar á auglýsingastofunni Jónsson & Le'macks ásamt Sigurði. Hann var meðal annars einn þeirra sem hannaði fyrir Útmeða herferð Geðhjálpar.

„Á sumrin er bjart alla nóttina og á veturna er dimmt yfir daginn. Mín hönnun var innblásin af þessum tveimur ólíku pólum,“ bætir hann við að lokum.

Verslunin Weekday er í Smáralind Kópavogi og verður opnuð klukkan ellefu á fimmtudaginn. Fyrstu 100 gestirnir fá 40% afslátt af vörum verslunarinnar, en það er 20% afsláttur allan daginn. Plötusnúðar halda uppi stuðinu og gjafapokar verða í boði á meðan birgðir endast.

Síðar um kvöldið verður sérstakt Weekday-partí á skemmtistaðnum Prikinu í Ingólfsstræti. Fram koma GDRN, Auður og DJ Karítas og þar verða einnig gjafapokar fyrir fyrstu gestina.