Körfubolti

Bucks gekk frá Celtics og meistararnir tóku forystuna | Myndbönd

Tómas Þór Þórðarson skrifar
Giannis Antetokounmpo skoraði 20 stig.
Giannis Antetokounmpo skoraði 20 stig. vísir/getty

Milwaukee Bucks gekk endanlega frá Boston Celtics í einvígi liðanna í undanúrslitum austurdeildar NBA-deildarinnar í körfubolta í nótt.

Milwaukee vann fimmta leikinn á heimavelli sannfærandi, 116-91, og einvígið, 4-1, en þetta er í fyrsta sinn síðan 2001 sem að Bucks leikur til úrslita í austrinu og enn möguleika á því að verða NBA-meistari.

Bucks-liðið sópaði Detroit Pistons, 4-0, í átta liða úrslitum austursins en tapaði fyrsta leik á móti Boston, 112-90. Síðan þá hefur Bucks aftur fundið taktinn og verið mun betra en Boston.

Giannis Antetokounmpo skoraði 20 stig, tók átta fráköst og gaf átta stoðsendingar fyrir heimamenn en Khris Middleton bætti við 19 stigum og Eric Bledsoe 18.

Golden State Warriors tók svo forystuna, 3-2, í hinu rosalega einvígi á milli meistaranna og Houston Rockets sem að Houston jafnaði með tveimur sigrum í röð á heimavelli.

Warriors vann í nótt, 104-99, en Kevin Durant meiddist á kálfa í leiknum og spilaði aðeins 32 mínútur. Þrátt fyrir það risu aðrir leikmenn upp en Klay Thompson skoraði úr mikilvægu sniðskoti þegar að 4,1 sekúnda var eftir.

Thompson var einmitt stigahæstur heimamanna með 27 stig en hann hitti úr fimm af tíu þriggja stiga skotum sínum. Steph Curry skoraði 25 stig en er áfram í smá basli fyrir utan þriggja stiga línuna og Durant skoraði 22 stig á 32 mínútum.

James Harden var að sjálfsögðu stigahæstur hjá Houston með 31 stig en hann tók að auki fjögur fráköstu og gaf átta stoðsendinga. Næsti leikur liðanna fer fram í Houston.

NBA


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.