Fjölgar í Airbnb en fækkar á hótelum

Gistinætur ferðamanna á öllum gististöðum voru um 694.000 í mars síðastliðnum, en þær voru um 719.000 í sama mánuði fyrra árs. Fjöldi greiddra gistinátta í mars dróst því saman um 3,4% milli ára, þar af var 5,5% samdráttur á hótelum og gistiheimilum, 3,3% fækkun á öðrum tegundum gististaða og 3,9% aukning á stöðum sem miðla gistingu gegnum Airbnb og svipaðar síður.

Þetta kemur fram í nýrri úttekt Hagstofunnar, þar sem jafnframt er greint frá því að flestar gistinætur hafi verið á hótelum og gistiheimilum, eða 444 þúsund talsins. Þar á eftir voru gistinætur í gegnum síður á borð við Airbnb, 134 þúsund talsins, og gistinætur á farfuglaheimilum, tjaldsvæðum og þess háttar gististöðum voru 116 þúsund.

Herbergjanýting í mars 2019 var 65,6%, sem er lækkun um 3,9 prósentustig frá mars 2018 þegar hún var 69,5%. Á sama tíma hefur framboð gistirýmis aukist um 4,3% mælt í fjölda herbergja. Nýtingin í mars var best á höfuðborgarsvæðinu, eða 80,0%.

Um 89% gistinátta á hótelum var skráð á erlenda ferðamenn, eða 334.800 sem er 1% færra en í mars 2018. Bandaríkjamenn voru með flestar gistinætur, þar á eftir koma Bretar og Þjóðverjar en gistinætur Íslendinga voru 39.800 talsins.

Þrátt fyrir þessa fækkun í marsmánuði fjölgaði gistinóttum um 3 prósent á tímabilinu apríl 2018 fram í mars 2019, sé miðað við sama tímabil árið áður.