Olís kaupir Mjöll Frigg

Olís undirritaði í dag kaupsamning um kaup á öllu hlutafé hreinlætisfyrirtækisins Mjöll Frigg ehf. Seljandi er Ölgerðin Egill Skallagrímsson hf. og stjórnendur Mjallar Friggjar.

Í fréttatilkynningu kemur fram að Mjöll Frigg hafi áratuga reynslu við að veita öllum iðnaði á Íslandi góða þjónustu og hafi þróað sín hreinlætisefni eftir þörfum iðnaðarins. Fyrirtækið hefur framleitt sín efni í samvinnu við kaupendur vörunnar síðan 1929.

Tekjur félagsins námu 663 milljónir króna árið 2018 og eru starfsmenn fyrirtækisins fimmtán talsins.

Olís sérhæfir sig í sölu og þjónustu með eldsneyti og aðrar olíuvörur, auk ýmissa nauðsynjavara til einstaklinga og fyrirtækja. Dreifinet félagsins er víðtækt og starfrækir það um 115 starfsstöðvar á um fimmtíu stöðum á landinu, aðallega undir merkjum Olís, ÓB og Rekstrarlands.

„Það er stefna Olís að veita viðskiptavinum sínum betri og víðtækari þjónustu og eru kaupin á Mjöll Frigg ehf. hluti af þeirri stefnu félagsins,“ segir í fréttatilkynningunni.

Kaupsamningur er gerður með fyrirvara um áreiðanleikakönnun og samþykki Samkeppniseftirlitsins.