Fréttir af andláti Benedorm stórlega ýktar

Skemmtistaðnum Benedorm Pósthússtræti í miðbæ Reykjavíkur hefur aðeins verið lokað tímabundið en ekki fyrir fullt og allt, að sögn eiganda staðarins. Umræða um meinta lokun hefur sprottið upp á samfélagsmiðlum en áhyggjufullir djammarar geta nú tekið gleði sína á ný – Benedorm opnar aftur.

Töluverð aðsókn hefur verið á Benedorm síðan staðurinn opnaði í nóvember síðastliðnum og því hefur fyrirvaralaust hlé á starfseminni vakið athygli, líkt og sjá má af tístunum hér að neðan, en því var jafnvel slegið föstu að staðurinn hefði farið á hausinn.

skil ekki benedorm hate

1. ódýr bjór
2. aldrei trúbador
3. tónlistin aldrei það há að maður þurfti að garga til að spjalla við fólk
4. opið til 3 um helgar
5. ekki morandi í fimmtugum köllum í jakkafötum að reyna við tvítugar gellur

ég er allavega að syrgja https://t.co/oDD6LIXtre

— Ída Logadóttir (@idaloga) March 31, 2019

Jæja, þetta fór á hausinn á tveimur mánuðum. Sýnir bara að konsept getur verið svo slæmt að 600 kr. bjór getur ekki einu sinni bjargað því. https://t.co/LS9XyozsxI

— Arnór B. Svarfdal (@arnorbs) March 31, 2019

Róbert Óskar Sigurvaldason eigandi Benedorm segir í samtali við Vísi að ástæða lokunarinnar sé einföld. Staðnum hafi verið lokað á meðan gerðar eru úrbætur á eldvörnum í eldhúsi. Þegar það komist í lag verði staðurinn opnaður aftur.

„Það er enginn bilbugur á okkur,“ segir Róbert.

Benedorm er rekinn í húsnæði hinnar sálugu Nóru magasín, sem skellti í lás í ágúst í fyrra eftir sólarlítið sumar. Kaffi Nora ehf., félagið utan um rekstur Nóru magasín, var svo tekið til gjaldþrotaskipta í september.

Veitingastaður og bar undir merkjum Nóru Magasin opnaði fyrst í Pósthússtræti 9 við Austurvöll árið 2013. Síðan þá hefur staðurinn gengið í gegnum eigendaskipti og breytingar en honum var til að mynda lokað í nokkra mánuði í fyrra vegna framkvæmda þar sem allt innanhúss var tekið í gegn. Þá gekk staðurinn enn og aftur í gegnum miklar breytingar áður en Benedorm opnaði í haust.