Burger King baðst afsökunar og fjarlægði rasíska auglýsingu

Burger King þurfti að eyða auglýsingu sem talin er hafa verið rasísk en í henni sést fólk eiga í mestu vandræðum með að borða hamborgara með risastórum prjónum.

Burger King bætist þannig í hóp vestrænna vörumerkja sem hafa verið sökuð um að gera grín að asískum matarvenjum, að því er segir í frétt Guardian um málið.

Skyndibitakeðjan fékk yfir sig holskeflu athugasemda á netinu eftir að auglýsingin birtist á Instagram-reikningi Burger King í Nýja-Sjálandi.

So this is the new Burger King ad for a “Vietnamese” burger ok coolcoolcoolcoolcool CHOPSTICKS R HILARIOUS right omg etcpic.twitter.com/zVD8CN04Wc

— 마리아. Maria. (@mariahmocarey) April 4, 2019

Undir Instagram-myndbandinu stóð að fólk gæti farið með bragðlaukana í ferðalag alla leið til Ho Chi Minh-borgar í Víetnam ef það bara smakkaði á nýjasta hamborgara Burger King sem heitir „Vietnamese Sweet Chilli Tendercrisp Burger.“

Instagram-færslunni var síðar eytt þar sem fjöldi athugasemda barst um að auglýsingin væri móðgandi og að með henni væri Burger King að gera grín að prjónum og asískum venjum.

„Prjónar eru alveg drepfyndnir, er það ekki,“ tísti einn nýsjálensku netverjanna sem gagnrýndu auglýsinguna og hélt áfram:

„Ég er orðin svo þreytt á rasisma. Af hvaða tagi sem er. Af því sem gerir grín að ólíkum menningarheimum til þeirra sem skjóta og myrða þá sem eru að biðja í sínu bænahúsi. Segið nei við hvaða birtingarmynd sem er.“

Í yfirlýsingu frá Burger King í gærkvöldi sagði að fyrirtækið hefði beðið sérleyfishafann í Nýja-Sjálandi um að fjarlægja auglýsinguna hið snarasta.

Keðjan baðst afsökunar, sagði að auglýsingin væri móðgandi og endurspeglaði ekki gildi Burger King. Aðrir bentu á meðan á það að aðalbragðefni borgarans, sæt chillisósa, væri mun algengari í Tælandi en Víetnam.