Viðskipti innlent

Ekki hægt að bóka flug með WOW til og frá London

Nadine Guðrún Yaghi og Sunna Kristín Hilmarsdóttir skrifa
Skúli Mogensen, eigandi félagsins, gerir nú allt til að bjarga fyrirtækinu sínu en þessi mynd var tekin á Keflavíkurflugvelli síðastliðið sumar.
Skúli Mogensen, eigandi félagsins, gerir nú allt til að bjarga fyrirtækinu sínu en þessi mynd var tekin á Keflavíkurflugvelli síðastliðið sumar. vísir/vilhelm
Fundað var víða um borg í gærkvöldi vegna stöðu WOW air eftir að viðræðum félagsins við Icelandair var slitið um miðjan dag.

Skúli Mogensen, eigandi félagsins, gerir nú allt til að bjarga fyrirtækinu sínu og hefur mbl.is eftir heimildum að vél flugfélagsins hafi verið kyrrett í Montreal í Kanada að beiðni leigusala hennar. Í morgun var ástæða seinkunarinnar sögð vélarbilun.

Leigusali þeirrar vélar sem er í Montreal á einnig aðra vél í flota WOW air sem er TF-NOW. Sú vél hefur verið í Kúbuflugi frá Bandaríkjunum um þessar mundir. Heimildir fréttastofu herma að sú vél hafi verið send til Kaliforníu í morgun að ósk leigusala.

Þá hefur WOW air aflýst áætlunarferðum til og frá Gatwick í London í morgun og svo virðist sem ekki sé hægt að bóka flug til borgarinnar með flugfélaginu næstu daga. Misvísandi fréttir berast af ástæðum þess að flugum sé aflýst og vélar sitji sem fastast á flugvöllum og er engin svör að fá frá forsvarsmönnum WOW air.

Svanhvít Friðriksdóttir, upplýsingafulltrúi félagsins, sagði í svari til fréttastofu rétt fyrir hádegi að WOW air ynni nú náið með kröfuhöfum og leigusölum félagsins. Þá verði flogið samkvæmt áætlun á morgun.

Skjáskot af vef WOW air þegar blaðamaður reyndi að bóka ferð til London á morgun.
Eftir því sem fréttastofa kemst næst er ekki hægt að bóka flug með WOW air til eða frá London á morgun og miðvikudag. Sé það reynt í gegnum bókunarsíðu flugfélagsins kemur upp melding um að ekkert flug sé til og frá borginni þessa daga.

Þá reyndi blaðamaður einnig að bóka flug til Kaupmannahafnar á morgun en fékk upp sömu meldingu um ekkert flug.

Flestar vélar WOW Air virðast hafa flogið samkvæmt áætlun í morgun en það gæti komið í ljós í dag hvort það takist að breyta skuldum félagsins í eignarhluti.

Samkvæmt yfirlýsingu flugfélagsins í gærkvöldi er meirihluti skuldabréfahafa og annarra lánardrottna langt komnir í viðræðum um endurskipulagningu skulda en fjölmiðlar hafa greint frá því að WOW hafi tapað rúmlega tuttugu milljörðum króna í fyrra.

Greint var frá því í gær að forsvarsmenn WOW-air hafi fundað með Samgöngustofu í gærkvöldi. Í samtali við fréttastofu segir Þórhildur Elín Elínardóttir, samskiptastjóri Samgöngustofu, að almennt séð snúist eftirlit Samgöngustofu um að tryggja flugöryggi.

Samgöngustofa hafi eftirlit með fjárhagsstöðu flugrekanda í því skyni að flugöryggi sé á öllum tímum tryggt, til dæmis viðhald véla og þjálfun áhafna. Stofnunin fari eftir evrópskri reglugerð um rekstur flugrekanda sem snýr að því að öryggi sé ávallt í fyrsta sæti.

Uppfært klukkan 15:12:Hægt er að bóka flug með WOW air til og frá London á morgun og á miðvikudag samkvæmt bókunarsíðu félagsins. Þegar blaðamaður reyndi það sama í hádeginu í dag var það ekki hægt og fékk hann upp meldinguna „ekkert flug.“ Svanhvít Friðriksdóttir, upplýsingafulltrúi WOW air, segir að líklega hafi ástæðan verið tæknilegt atriði. Samkvæmt upplýsingum frá WOW air hafa engin flug verið felld niður frá og með morgundeginum en nokkur flug eru fullbókuð þessa vikuna. 


Tengdar fréttir

Skúli þarf fimm milljarða til að halda flugi

Forsvarsmenn WOW leggja til fækkun í vélaflota og að skuldum verði breytt í hlutafé svo hægt sé að halda rekstri áfram. Starfsmenn flugfélagsins viðra hugmyndir um að leggja brot launa í hlutafé.






Fleiri fréttir

Sjá meira


×