Skýrsla um 737 MAX-slysið væntanleg í vikunni

Starfsmenn eþíópíska samgönguráðuneytisins gera ráð fyrir að bráðabirgðaniðurstöður rannsóknar um flugslys Ethiopian Airlines muni ligga fyrir í þessari viku. Flugvélaframleiðandinn Boeing, sem sætt hefur harðri gagnrýni eftir hrap 737 MAX 8-þotunnar þann 10. mars síðastliðinn, bíður í ofvæni eftir niðurstöðunum, rétt eins og aðrir í fluggeiranum.

Ekki er þó ljóst hvort að þær geti, með óyggjandi hætti, svarað spurningum um hvort rekja megi slysið til margumrædds hugbúnaðar 737-vélanna. Hugbúnaðurinn á að varna því að þoturnar ofrísi og hefur verið þungamiðjan í rannsóknum á slysi Ethiopian Air, rétt eins og í hrapi 737 MAX-vélar Lion Air, sem fórst undan ströndum Jövu í lok október. Tæplega 350 manns létu lífið í slysunum tveimur.

Boeing hefur unnið hörðum höndum að hugbúnaðaruppfærslu á síðustu vikum og gert er ráð fyrir að hún verði formlega kynnt til sögunnar á fundi í höfuðstöðvum fyrirtækisins í Renton á morgun. Heimildarmenn sem sagðir eru þekkja til vinnunnar við uppfærsluna segja að hún muni meðal annars fela í sér breytingar á skynjurunum sem ætlað er að greina ofrisið. „Greini tveimur skynjurum mikið á,“ eins og það er orðað í frétt Reuters, mun slökkna á ofrisvarnarbúnaðinum, í stað þess að sjálfstýring vélanna grípi inn í og beini nefi þeirra niður eins og þekkist í dag.

Sjá einnig: Icelandair sendir fólk á fund Boeing um 737 MAX

Forstjóri Ethiopian Airlines sagði í gær að líklegt væri að rekja mætti slysið þann 10. mars til búnaðarins. Hann hefur þó enga aðkomu að rannsókn slyssins og var ekki tilbúinn að greina frá því hvaðan hann hefði þessar upplýsingar og því hefur yfirlýsingum hans verið tekið með fyrirvara í erlendum miðlum.

Eins og Vísir greindi frá í gær mun Icelandair senda sína fulltrúa á fundinn í Renton, en íslenska flugfélagið hefur verið með þrjár 737 MAX-þotur í rekstri á síðustu mánuðum. Reuters segir þó að meira þurfi að koma til en hugbúnaðaruppfærslan ein og sér, flugstjórnaryfirvöld verði að fallast á uppfærsluna svo að hægt verði að aflétta kyrrsetningu vélanna um víða veröld.

Talsmaður eþíópíska samgönguráðuneytisins, sem hefur yfirumsjón með rannsókn slyssins í Addis Ababa, sagði í samtali við fjölmiðla í dag að það verði að teljast „mjög, mjög líklegt“ að bráðabirgðaniðurstöður verði kynntar í vikunni. Þó geti alltaf eitthvað óvænt komið upp og því ekki fullkomlega hægt að útiloka að það gæti dregist eitthvað.