Fótbolti

Heimir Hallgríms í forsíðuviðtali á heimasíðu FIFA

Óskar Ófeigur Jónsson skrifar
Heimir Hallgrímsson frá tíma sínum sem þjálfari íslenska landsliðsins.
Heimir Hallgrímsson frá tíma sínum sem þjálfari íslenska landsliðsins. Vísir/Getty

Heimir Hallgrímsson fer yfir gömul tímana með íslenska landsliðinu og nýju tímana í Katar í stóru forsíðuviðtali á heimasíðu Alþjóða knattspyrnusambandsins.

Heimir Hallgrímsson sagði meðal annars frá uppáhalds setningunni sem hann sagði við strákana í landsliðinu á milli Evrópumótsins 2016 og heimsmeistaramótsins 2018. Þau áttu örugglega sinn þátt í því að íslenska landsliðið fylgdi eftir ævintýrinu í Frakklandi með því að komast á HM í fyrsta sinn og setja með því nýtt heimsmet sem fámennasta þátttökuþjóð í sögu HM.

Heimir hætti með íslenska landsliðið eftir HM í Rússlandi og réði sig síðan sem þjálfara hjá liði Al Arabi í Katar.



Blaðamaður kynnir Heimi til leiks og hefur eftir Eyjamanninum að þegar kemur að fótboltanum þá eigi eyjan í norðri og Arabíuríkið heilmargt sameiginlegt.

Þar kemur líka fram að Heimir sé búinn að leggja tannlæknborinn til hliðar nú þegar hann er fluttur til Katar. Al Arabi hefur hingað til ekki haft mikla þolinmæði fyrir þjálfurum en Heimir er sá átjándi í röðinni frá árinu 2010.

Landslið Katar vann Asíukeppnina á dögunum og koma þar mörgum á óvart. Blaðamaður FIFA telur sig heyra bergmál frá íslenska ævintýrinu í uppkomu katarska landsliðsins.

Skjámynd/Forsíða heimasíðu FIFA

Heimir gerir upp tímann með íslenska landsliðinu í viðtalinu en talar einnig um það sem er að gerast í Katar. Hann fer líka yfir það af hverju hann valdi starfið í Katar yfir tilboð frá Þýskalandi og Kanada.

„Ég vildi frá nýja áskorun á stað þar sem ég vissi að væri mikill vöxtur. Deildin hér í Katar er að stækka hratt. Hluti ástæðunnar er að HM er að koma hingað en það er líka aukinn áhugi fyrir fótbolta í landinu og meðal ráðamanna. Í þessu umhverfi þar sem ég er í dag, þá er að ég að læra eitthvað nýtt hvert sem ég kem og ég var einmitt að leita að slíku. Ég vil halda áfram að vaxa sem þjálfari og sem einstaklingur. Ég þurfti á þessu að halda,“ segir Heimir.

„Leiðin að árangri hjá Katar hefur verið svipaður og sá hjá íslenska landsliðinu. Í báðum löndum er byggt á fáum leikmönnum og þeir þurfa því að fá tækifæri til að vaxa og dafna. Flestir leikmenn í Asíumeistaraliði Katar hafa líka spilað saman með yngri landsliðunum alveg eins og stór hluti af íslenska landsliðinu,“ sagði Heimir.

„Stærsta áskorunin er alltaf hugarfars eðlis. Eins og þegar við hlutum á neikvæða umræðu eins og „nú höfum við náð markmiðinu okkar þannig að nú getum við bara farið niður á við,“ segir Heimir,

„Þetta heyrum við frá fólkinu í kringum okkur, í fjölmiðlunum en við erum líka að hugsa þetta sjálfir ef við pössum okkur ekki. Það er alltaf stærsta áskorunin að fá alla til að vinna áfram í því að gera enn betur, sama hvað hefur gerst,“ sagði Heimr.

„Uppáhalds setningin mín á milli EM 2016 og HM 2018 var að árangur er ekki endastöð, heldur er þetta ferðalag í rétta átt. Árangur katarska landsliðsins stoppar ekki nú þegar liðið er orðið Asíumeistari. Árangur er að byggja ofan á það og fá alla til að finna leiðir til að bæta sig enn frekar,“ sagði Heimir.

Það má lesa allt viðtalið við hann hér.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.