Valgarð vann fjögur gullverðlaun

Valgarð Reinhardsson vann Íslandsmeistaratitla á fjórum af sex áhöldum á seinni degi Íslandsmótsins í áhaldafimleikum sem fram fór í dag.

Valgarð, sem varð Íslandsmeistari í fjölþraut í gær, vann gull á hringjum, stökki, tvíslá og svifrá í dag.

Á gólfi sigraði Eyþór Örn Baldursson og Arnþór Daði Jónsson vann keppni á bogahesti.

Í kvennaflokki skiptu keppendur gullverðlaununum bróðurlega á milli sín.

Andrea Ingibjörg Orradóttir vann keppni á stökki, Sunna Kristín Ríkharðsdóttir hreppti gullið á slá og Katharina Sybilla Jóhannsdóttir vann gólfið. Agnes Suto-Tuuha, sem varð Íslandsmeistari í fjölþraut í gær, vann keppni á tvíslá.

Agnes náði þeim árangri að enda á verðlaunapalli á öllum fjórum áhöldum.