Sérfræðingurinn: Til að byrja með fær þessi ofboðslega framliggjandi vörn falleinkunn

Sebastian Alexandersson, sérfræðingur Stöðvar 2 Sports, segir að tap Íslands gegn Brasilíu hafi verið slakasti leikur liðsins á HM í handbolta en Ísland lauk keppni í dag.

Ísland tapaði með þriggja marka mun, 32-29, eftir að staðan hafi verið jöfn í hálfleik, 15-15. Basti var ekki hrifinn af liðinu í dag.

„Mér fannst þetta slakasti leikur liðsins á mótinu, bæði varnar- og sóknarlega,“ sagði Basti í samtali við Vísi í leikslok. „Ég ítreka það að það er mín skoðun en ég skil ekki afhverju við erum svona framarlega í vörn.“

„Við erum að búa til mikið af svæðum og skiljum marga leikmenn eftir í einn á móti einum. Mér fannst við vera spilaðir úr stöðum, línumenn ná að rykkja í stór svæði. Ég hefði viljað sjá okkur á köflum í þessu móti og sérstaklega í dag að prufa að vera aðeins aftar.“

„Markvarslan var fín. Mér fannst við spila frábæra vörn gegn Makedóníu, Þýskalandi og stórum hluta gegn Frökkum en þá vorum við ekki svona framarlega. Á móti Frökkunum fórum við reyndar framar en þá byrjuðu vandræðin varnarlega.“

„Maðurinn er með einhverja sýn og hefur trú á þessu consepti sem við skulum gefa honum tíma til að innleiða. Til að byrja með fær þessi ofboðslega framliggjandi vörn falleinkunn.“

Elvar og Ómar sóknarlega sprækastir

Brassarnir pressuðu okkar drengi langt út á völlinn og Basti segir að það gæti hafa tekið um sig einhver taugatitringur en segir fyrst og fremst að menn hafi verið allt of staðir.

„Við vorum rosalega staðir. Það var lítil hreyfing án bolta og við nýttum völlinn illa. Það var erfitt þegar þeir pressuðu okkar ungu leikmenn framarlega. Þeir gerðu sig seka um klaufaleg mistök en það er að mörgu leyti af því við vorum svo staðir.“

„Þeir ráku okkur mikið frá vörninni og það gerist í tvígang að Gísli Þorgeir fær hann á eigin vallarhelming. Planið hjá Brasilíu var að reka skytturnar frá vörninni því þá er vegalengdin lengri og þú ert lengi að koma þér í skotfæri.“

„Mér fannst sóknarleikurinn lagast í síðari hálfleik er við fengum innleysingar og aðeins betra flæði á boltann en alltof mikið staðir í sóknarleiknum og gerðum vörninni þetta auðvelt fyrir. Sér í lagi í fyrri hálfleik. Mér fannst Elvar og Ómar sóknarlega sprækastir.“

Þreytumerki á hópnum

Ísland spilaði hörkuleiki bæði laugardag og sunnudag en síðustu tveir dagar hafa svo verið frí. Basti veit ekki hvort að það hafi eitthvað truflað hópinn að fá einn auka frídag í gær.

„Það var augjós þreytumerki á hópnum. Það er búið að vera rosaleg stemning og leikgleði í hópnum. Það er oft þannig að þegar maður er þreyttur og fær frídag þá er oft erfitt að gíra sig í gang. Mér fannst við sita eftir í því.“

„Það er voðalega auðvelt fyrir okkur sem erum ekki í þessu álagi að tala eitthvað um það að gíra sig upp. Það er meira en að segja það. Margir af þessum strákum hafa aldrei kynnst svona álagi áður.“

„Það vantar svo afar öfluga leikmenn hjá okkur og við höfum einfaldlega ekki sömu breidd og aðrar þjóðir. Ef maður skoðar mótið þá er þetta rosalega mikilvægt mót fyrir þetta framtíðarlið okkar. Liðið er í ofboðslega góðum höndum.“

Þrátt fyrir tapið í síðasta leiknum í dag horfir Basti björtum augum á framhaldið.

„Ég hef sagt það áður að ef við losnum við meiðsli í þessum hópi þá verðum við með eitt af bestu liðunum eftir þrjú til fimm ár. Ungu drengirnir verða þroskaðri og við erum með frábæran þjálfara. Við erum ekki í topp tíu í dag.“

„Það er ekkert sem maður á að sætta sig við en við erum þar og við verðum að vinna í því og reyna að komast í hóp með tíu bestu þjóðum heims. Núna erum við í 10.-15. sæti,“ sagði Basti.