Innlent

Töldu málið minniháttar þar til símtalið barst frá spítalanum

Kolbeinn Tumi Daðason skrifar
Landspítalinn Fossvogi.
Landspítalinn Fossvogi. Vísir/Vilhelm
Lögreglumaður sem kom á vettvang líkamsárásar á Shooters aðfaranótt 26. ágúst sem leiddi meðal annars til lömunar dyravarðar fyrir neðan háls segir árásina hafa verið yfirstaðna þegar hann mætti á vettvang. Tilkynnt hafi verið um yfirstaðin slagsmál og dyravörður á staðnum tekið á móti þeim, beint þeim inn í enda Shooters þar sem dyravörður lá í tröppum við bakdyr staðarins.

Lögreglumaðurinn lýsti því hvernig maðurinn hefði legið við bakhurðina sem snúr út að Austurvelli. Þeir hafi ákveðið að hreyfa ekkert við manninum og látið sjúkraflutningamenn sem mættu á svipuðum tíma um það. 

Artur Pawel Wisocki, sem ákærður er fyrir líkamsárásina sem leiddi til lömunar dyravarðarins fyrir neðan háls, neitar því að hafa hrint honum niður fyrrnefndar tröppur. Hann hafi þó elt hann inn á staðinn en ber svo að þeir hafi báðir dottið. Dyravörðurinn segir Artur hafa sparkað í sig og kýlt eftir að hann féll til jarðar og er Artur ákærður fyrir það líka.

Árásin var á Shooters í Austurstræti.Fréttablaðið/Anton Brink

Greiðslukortakvittun auk upptöku leiddi til handtöku

Lögreglumaðurinn sagði að við fyrst sýn hefðu atvik virst minniháttar en hann minnti að útkallið hefði verið undir miðnætti. Einum til tveimur klukkustundum síðar hefði borist símtal frá Landspítalanum um alvarleika áverka dyravarðarins sem fann ekki fyrir líkamanum fyrir neðan háls. 

Í framhaldinu hafi lögregla farið aftur á vettvang, rætt við vitni á staðnum og lagt hald á upptökur úr öryggismyndavélum. 

Umræddur lögreglumaður hafi svo farið í að finna út úr því hverjir umræddir árásarmenn hefðu verið. Til grundvallar lá upptaka auk greiðslukortakvittunar vegna kaupa eins þeirra sem höfðu flúið á brott. Það leiddi til handtöku fjögurra manna, þeirra á meðal Artur og Dawid Kornacki. 

Lögreglumaðurinn lýsti því að hinn dyravörðurinn sem hefði orðið fyrir árás utandyra, var dreginn þangað samkvæmt eigin vitnisburði sem nýtur stuðnings í vitnisburði kollega af English Pub, hefði borið sig vel. Verið með roða hér og þar en klæddur í svo öfluga úlpu að hann hafi ekki séð neitt meira. 

Þá upplýsti hann að fólkið á Shooters, sem rætt var við á vettvangi, hefði ekki séð þegar dyravörðurinn féll til jarðar aftast á staðnum við dyrnar sem snúa út að Austurvelli. Fólk hefði aðeins heyrt læti og barþjónn á staðnum sagðist hafa heyrt rúðu brotna. 

Varðandi árásina á hinn dyravörðinn, sem hafði ekki jafnslæmar afleiðingar, sagði dyravörður á English sem fylgdist með að fjórir eða fimm menn hefðu dregið dyravörðinn út á gangstétt. Þar hefðu þeir allir sem einn látið höggin dynja á manninum um allan líkama. Hann hafi reynt að fá þá til að hætta þessu en án árangurs. Skömmu síðar hafi þeir horfið af vettvangi

Artur Pawel Wisocki í Héraðsdómi Reykjavíkur í morgun.Vísir/Vilhelm

Um aðdragandann

Artur Pawel Wisocki er ákærður fyrir stórfellda líkamsárás á næturklúbbnum Shooters í Austurstræti þann 26. ágúst síðastliðinn. Dyravörðurinn hefur síðan ekki getað staðið en hann lamaðist fyrir neðan háls við fallið. Aðalmeðferð í málinu hófst í Héraðsdómi Reykjavíkur í morgun.

Artur hafði aðeins verið við vinnu á Íslandi í nokkra daga þegar atburðurinn átti sér stað. Hann hefur verið í gæsluvarðhaldi síðan.

Aðdragandi árásarinnar var sá að fjórum pólskum vinum var vísað af staðnum. Sneru þeir aftur með tvo landa sína til viðbótar hálftíma síðar og sjást á myndbandsupptökum ráðast á dyraverðina.

Auk Arturs er vinur hans Dawid Kornacki ákærður fyrir þátt sinn í slagsmálunum. Artur viðurkennir að hafa ráðist á annan dyravörðinn og elt hann inn á staðinn. Þar féll dyravörðurinn til jarðar með fyrrnefndum afleiðingum. Saksóknari í málinu telur upptöku sína greinilega að Artur hafi hrint honum með afli en þessu neitar Artur.

Artur slóst svo í hóp Dawid og hinna tveggja sem létu höggin dynja á hinum dyraverðinum áður en þeir yfirgáfu svæðið. Í framhaldinu segist dyravörðurinn hafa fundið kollega sinn sem jafnframt er hans besti vinur á gólfi staðarins. Sá hafi með naumindum getað beðið hann um aðstoð því hann teldi að hann væri að deyja.

Ákærðu segja dyraverðina hafa sýnt sér óvirðingu umrætt kvöld en fyrir þetta taka dyraverðirnir.

Miskabótakrafa dyravarðarins sem lamaðist hljóðar upp á 123 milljónir króna.


Tengdar fréttir

Neitar að planið hafi verið að ráðast á dyraverðina

Dawid Kornacki, 32 ára Pólverji, sem er ákærður fyrir sérstaklega hættulega líkamsárás aðfaranótt 26. ágúst fyrir utan skemmtistaðinn Shooters í Austurstræti segist sjá mikið eftir því sem gerðist umrætt kvöld.

Dyravörðurinn mun þurfa aðstoð ævilangt

Læknir dyravarðarins sem lamaðist fyrir neðan háls eftir líkamsárás aðfaranótt 26. ágúst í fyrra segir hann munu þurfa aðstoð ævilangt. Um sé að ræða svokallaðan alskaða.

Segir Artur hafa kýlt og sparkað í sig þar sem hann lá

Læknir sem tók á móti alvarlega slösuðum dyraverðinum umrædda nótt telur að töluvert mikinn kraft þurfi til að brjóta hálshryggjarlið. Brotið varð til þess að gekk inn í mænuna og olli lömuninni.




Fleiri fréttir

Sjá meira


×