Keilir kaupir Flugskóla Íslands

Flugakademía Keilis hefur fest kaup á Flugskóla Íslands, einum elsta starfandi flugskóla landsins. Samanlagður fjöldi nemenda í bóklegu og verklegu námi í flugskólunum er á fimmta hundrað.

Í tilkynningu frá Keili segir að ekki sé búist við miklum breytingum á starfsemi skólanna fyrst um sinn. Áfram mun verkleg flugkennsla fara fram á alþjóðaflugvellinum í Keflavík og Reykjavíkurflugvelli. Þá segjast aðstandendur hafa í hyggju að efla starfsstöðvar á landsbyggðinni, meðal annars á Selfossi og Sauðárkróki.

Haft er eftir Rúnari Árnasyni, forstöðumanni Flugakademíu Keilis, að hann telji kaupin styrkja flugkennslu á Íslandi. Reynsla og þekking stjórnenda og kennara Flugskóla Íslands muni vonandi hafa jákvæð áhrif á starfsemi Keilis.

Baldvin Birgisson, skólastjóri Flugskóla Íslands, tekur í sama streng í tilkynningunni. „Það er auðvitað ákveðin eftirsjá eftir að hafa rekið flugskóla í hartnær þrjátíu ár en við teljum þessi kaup afar jákvæð. Með öflugum og traustum skóla verður hægt að stuðla að áframhaldandi vexti og þróun flugnáms á Íslandi og auka samstarf við flugrekendur,“ segir Baldvin.