Afkomuviðvörun vegna lægri flugfargjalda

Lággjaldaflugrisinn Ryanair hefur lækkað afkomuspá sína fyrir yfirstandandi rekstrarár vegna lækkunar á flugfargjöldum. Þetta er í annað sinn á um þremur mánuðum sem flugfélagið þarf að senda frá sér afkomuviðvörun. Framkvæmdastjóri Ryanair, Michael O' Leary, segist ekki geta útilokað að flugfélagið muni þurfa að lækka fargjöldin enn frekar. Gert er ráð fyrir því að lækkunin hafi numið um 7 prósentum í vetur, en fyrri áætlanir hljóðuðu upp á 2 prósenta lækkun.

Haft er eftir O' Leary á vef breska ríkisútvarpsins að lág flugfargjöld hafi nú þegar valdið töluverðum titringi meðal keppinauta Ryanair. Vísar hann þar sérstaklega til lággjaldaflugfélagsins Flybe, sem var á barmi gjaldþrots áður en hópur fjárfesta, þar á meðal flugfélagið Virgin Atlantic, kom því til bjargar fyrir um viku síðan. Fleiri lággjaldaflugfélög hafa barist í bökkum eða verið úrskurðuð gjaldþrota á síðustu misserum, er þar skemmst að nefna WOW Air og Primera Air, en það síðarnefnda lagði upp laupana í haust eins og frægt er orðið.

Sjá einnig: Sér fram á kaldan vetur hjá lág­gjalda­flug­fé­lögum

Ryanair áætlar nú að hagnaður félagsins verði á bilinu 1 til 1,1 milljarður evra, 152 milljarðar íslenskra króna. Fyrri spár höfðu gert ráð fyrir um 100 milljón evru meiri hagnaði á rekstrarárinu, sem lýkur þann 31. mars næstkomandi. Þrátt fyrir afkomuviðvörunina sér Ryanair fram á að flytja fleiri farþega en fyrri spár gerðu ráð fyrir.

O' Leary segir að vandræðin megi að einhverju leyti rekja til gríðarlegs framboðs á flugsætum í styttri flugferðir innan Evrópu. Fyrir vikið hafi neytendur notið lægri flugfargjalda en nokkru sinni.

„Við teljum að þetta lággjaldaumhverfi muni verða til þess að afhjúpa fleiri keppinauta okkar í taprekstri; til að mynda WOW, Flybe og jafnvel Germania, sem öll eru til sölu þessa stundina,“ segir O'Leary.