Arnór Ingvi flaug ekki með félögum sínum til London en nær samt Chelsea leiknum

Arnór Ingvi Traustason og félagar í Malmö FF spila í kvöld við Chelsea í seinni leik liðanna í 32 liða úrslitum Evrópudeildarinnar.

Það var ekki öruggt að Arnór Ingvi gæti spilað leikinn á Stamford Bridge í kvöld en hann staðfesti á Instragram síðu sinni að hann sé á leiðinni til London.

Arnór Ingvi flaug ekki til London með félögum sínum á miðvikudagsmorguninn því kærasta hans, Andrea Röfn Jónasdóttir, átti von á þeirra fyrsta barni og þau eignuðust síðan stúlku í gær.

Andrea Röfn hafði farið ellefu daga fram yfir tímann en barnið kom í heiminn í gær og nýi pabbinn gat því drifið sig aftur í vinnuna í dag.

Uwe Rösler, þjálfari Malmö FF, lét vita af fæðingunni á blaðamannafundi í gær. „Við getum allir fagnað núna því hann eignaðist litla prinsessu,“ sagði Rösler en gat þá ekki staðfest komu Arnórs í dag.

„Við sjáum til hvernig þetta gengur hjá þeim. Við vonumst eftir því að Arnór komi á morgun því við þurfum á okkar bestu mönnum að halda,“ sagði Rösler.

Chelsea vann fyrri leik liðanna 2-1 í Svíþjóð og það þarf því margt að ganga upp í kvöld ætli Malmö að slá út ensku bikarmeistarana.

Arnór Ingvi setti í dag mynd inn á Instagram (sjá fyrir neðan) þar sem er mynd af honum á flugvellinum og á henni stóð „London, United Kingdom“ en íslenski landsliðsmaðurinn er þar með mættur til Lundúna og verður með í kvöld.

Leikur Chelsea og Malmö FF hefst klukkan 20.00 í kvöld og verður sýndur beint á Stöð 2 Sport.