Líkams­á­rásir í Kópa­vogi og Breið­holti

Tilkynnt var um tvær líkamsárásir til lögreglu á höfuððborgarsvæðinu í nótt, annars vegar í Breiðholti og hins vegar í Kópavogi.

Í dagbók lögreglu segir að tilkynnt hafi verið um líkamsárás í heimahúsi í Breiðholti skömmu eftir miðnætti. Málið telst upplýst en rannsókn þess lauk í nótt að skýrslutökum loknum. 

Á þriðja tímanum var svo maður handtekinn eftir að hafa framið líkamsrás í Kópavogi. Er hann í haldi lögreglu þar til unnt verður að ræða við hann þegar víman er af honum runnin. Um svipað leyti var maður handtekinn í Kórahverfi í Kópvogi en sá hafði misst stjórn á sér sökum fíkniefnaneyslu. Maðurinn var fluttur undir læknishendur til skoðunar og að því loknu vistaður hjá lögreglu.

Þjófnaður og innbrot

Nokkuð var um tilkynningar um þjófnað og innbrot í gærkvöldi og í nótt. Skömmu fyrir klukkan 23 var tilkynnt um þjófnað í heimahúsi í austurbæ Reykjavíkur og eru aðilar í haldi vegna málsins. Nokkru síðar var svo tilkynnt um innbrot í Grafarvogi þar sem brotamenn voru ungir að árum. Foreldrar voru kvaddir til svo unnt væri að klára málið.

Nokkru fyrir klukkan eitt í nótt var tilkynnt um húsbrot í Grafarholti þar sem einn er nú í haldi lögreglu. Húsráðandi hafði áður komið að manninum þar sem hann var að taka saman muni í poka.

Um tvöleytið var maður handtekinn í miðborg Reykjavíkur en hann hafði unnið tjón á nokkrum bifreiðum í bílastæðahúsi. Sá var í mjög slæmu ástandi sökum vímuefnaneyslu. Sömuleiðis var maður handtekinn vegna innbrota í bíla í hlíðahvefinu í Rvík. Aðilinn var í slæmu ástandi sökum ölvunar og gistir nú fangageymslur þar til unnt verður að ræða við hann.

„28 mál komu inn á borð lögreglu þar sem hún var að aðstoða fólk sökum ölvunnar, samkvæmishávaða í heimahúsum, vegna veikinda fólks, minniháttar meiðsla og aðfinnsluverðs aksturslags,“ segir í dagbók lögreglu.