Oddur áfram markahæstur hjá toppliðinu og spennusigur hjá Ágústi

Oddur Grétarsson heldur áfram að raða inn mörkunum fyrir Balingen í þýsku B-deildinni í handbolta en Balingen er áfram á toppnum eftir 26-24 sigur á TuS N-Lübbecke í kvöld.

Balingen var þremur mörkum yfir í hálfleik, 13-10, og þeir héldu forystunni í síðari hálfleik. Oddur var markahæstur í liði Balingen með sex mörk en Balingen er með fimm stiga forskot á toppi deildarinnar.

Ragnar Jóhannsson skoraði fjögur mörk fyrir Hüttenberg í sömu deild sem vann tveggja marka sigur, 21-19, á VfL Lübeck-Schwartau. Hüttenberg er í tíunda sæti deildarinnar.

Ágúst Elí Björgvinsson og félagar eru komnir í 2-1 gegn Malmö í átta liða úrslitunum í Svíþjóð. Vinna þarf þrjá leiki til að komast áfram en Ágúst varði vel í 23-22 sigri í kvöld.