Fyrrverandi sjóðsstjóri hjá GAMMA stofnar sjóðinn Algildi

Jóhann Gísli Jóhannesson, sem starfaði áður sem sjóðsstjóri hjá GAMMA Capital Management, hefur komið á fót fagfjárfestasjóðnum Algildi.

Í samtali við Markaðinn segir Jóhann Gísli að sjóðurinn, en starfsemi hans hófst fyrir fáeinum vikum, geti að hámarki orðið um 1.500 milljónir króna að stærð. Í síðasta mánuði nam hlutafé sjóðsins, sem hefur hingað til komið frá fjársterkum einkafjárfestum, nokkur hundruð milljónum króna.

Sjóðurinn mun fjárfesta í bæði skráðum hlutabréfum og skuldabréfum á Íslandi.

Jóhann Gísli var sjóðsstjóri hlutabréfa- og fyrirtækjaskuldabréfasjóða hjá GAMMA á árunum 2015 til 2018 en þar áður vann hann hjá Íslandsbanka og sem sjóðsstjóri innlendra hlutabréfa hjá Íslandssjóðum.