Boeing ætlar að hætta að rukka fyrir viðbótaröryggi

Öryggiskerfi sem flugvélaframleiðandinn Boeing seldi flugfélögum aukalega voru ekki til staðar í 737 Max-vélunum sem hröpuðu í Indónesíu og Eþíópíu. Fyrirtækið ætlar að gera kerfin að staðalbúnaði þegar hugbúnaðaruppfærsla sem það hefur unnið að eftir flugslysin mannskæðu verður tilbúin.

Reuters-fréttastofan segir að kerfin, sem voru seld sem aukahlutir, hefðu mögulega getað greint vandamálin sem urðu flugvélunum tveimur að falli. Tæplega 350 manns fórust í slysunum tveimur.

New York Times segir að Boeing hafi rukkað flugfélög upp í topp fyrir aukahlutina. Mörg flugfélög, þar á meðal lágjaldaflugfélög eins og Lion Air, indónesíska flugfélagið, sleppi því að kaupa þá og eftirlitsaðilar geri ekki kröfu um að þeir séu til staðar.

Líkindin hafa fundist með slysunum og hefur athyglin beinst að sjálfstýringu vélanna sem tekin var í notkun fyrir tveimur árum. Grunur leikur á að rangar upplýsingar frá skynjara gætu hafa virkjað kerfi sem á að koma í veg fyrir að vélin fari í ofris í tilfelli Lion Air-vélarinnar.

Mögulegt er talið að aukahlutirnir, mælar sem sýndu annars vegar upplýsingar úr afstöðuskynjurum og hins vegar sem gæfu til kynna ef misræmi væri á milli upplýsinga frá skynjurunum, hefðu getað hjálpað flugmönnum vélanna á Indónesíu og í Eþíópíu að átta sig á að eitthvað bjátaði á fyrr.

Rukka því þau geta það

Boeing vinnur nú að hugbúnaðaruppfærslu fyrir 737 Max-vélarnar sem voru kyrrsettar skömmu eftir slysið á Indónesíu. New York Times segir að mælirinn sem gefur til kynna að misræmi sé í upplýsingum frá skynjurum verði staðalbúnaður í þeirri uppfærslu.

Engu að síður verður afstöðumælirinn en valkvæður og þurfa flugfélög að kaupa hann aukalega. Björn Fehrm, greinandi hjá flugmálaráðgjafarfyrirtækinu Leeham, segir við bandaríska blaðið að þeir mælar kosti svo gott sem ekki neitt fyrir flugfélög að setja upp.

„Boeing rukkar fyrir þá vegna þess að þau geta það en þeir eru lykilatriði fyrir öryggi,“ segir Fehrm.

Bandarísk yfirvöld hafa nú hafið rannsókn á því hvernig Flugmálastofnun Bandaríkjanna (FAA) vottaði 737 Max-vélar Boeing.

Fréttin hefur verið uppfærð.