Niðurstaðan sætir furðu að mati Valitors

Niðurstaða Héraðsdóms Reykjavíkur í máli Datacell og Sunshine Press, rekstrarfélagi Wikileaks, sætir furðu að mati Valitors. Líklegt er að fyrirtækið áfrýji niðurstöðu dómsins til Landsréttar.

Greiðslukortafyrirtækið Valitor var í dag dæmt til að greiða Datacell og Sunshine Press, rekstrarfélagi Wikileaks, samanlagt 1,2 milljarð króna í bætur vegna ólögmætrar riftunar Valitors á samningi um greiðslugátt fyrir söfnunarfé til Wikileaks.

Í tilkynningu frá Valitor segir að Sunshine Press hafi aldrei átt í neinu viðskiptasambandi við Valitor, auk þess sem félagið hafi aldrei haft nema hverfandi tekjur. Því hafi milljarða skaðabótakrafa Sunshine press komið á óvart.

„Valitor hefur frá upphafi bent á að enginn grundvöllur sé fyrir kröfugerð SPP en meirihluti héraðsdóms kemst að annarri niðurstöðu í dag. Hins vegar skilaði einn þriggja dómara séráliti og vildi sýkna Valitor alfarið enda hafi ekkert tjón verið sannað. Valitor er að fara yfir dómsniðurstöðuna og mun væntanlega áfrýja málinu til Landsréttar,“ segir í tilkynningu Valitor.

Þar er einnig bent á að niðurstaða dómstólsins hafi engin áhrif á rekstrarhæfi Valitor né þjónustu við viðskiptavini félagsins. Fjárhagsleg staða félagsins sé sterk. Arion banki, eigandi Valitor, er fjárhagslegur bakhjarl félagsins í málinu. Bankinn sendi frá sér afkomuviðvörun eftir að niðurstaða í dómsmálinu lá fyrir.

Í henni segir að að fenginni niðurstöðu Héraðsdóms í máli gegn Valitor verða áhrif óreglulegra liða á afkomu Arion banka á fyrsta ársfjórðungi 2019 neikvæð um samtals 1,2 milljarða króna.