Skallagrímskonur gerðu góða ferð í Hólminn

Skallagrímur hafði betur gegn Snæfelli í Dominos deild kvenna þegar liðin mættust í Stykkishólmi í dag í mikilvægum leik upp á sæti í úrslitakeppninni.

Skallagrímur setti tóninn strax í upphafi leiks og leiddi með tíu stigum eftir fyrsta leikhluta. Níu stiga munur var á liðunum í leikhléi og hélt Skallagrímur tökunum á leiknum allan tímann.

Fór að lokum svo að Borgnesingar unnu með þrettán stigum, 74-87.

Carmen Tyson Thomas fór mikinn að vanda; skoraði 33 stig auk þess að taka 18 fráköst. Sigrún Sjöfn Ámundadóttir var sömuleiðis öflug í liði Skallagríms með 19 stig, 10 fráköst og 9 stoðsendingar. Í liði Snæfells var Kristen Denis atkvæðamest með 21 stig.