Bæjarstjóranum ekki borist nein afsökunarbeiðni

„Ég hef persónulega ekki fengið neina afsökunarbeiðni eða skilaboð frá neinum sem þátt tóku í þessum fundi,“ segir Íris Róbertsdóttir bæjarstjóri í Vestmannaeyjum en miður falleg ummæli nokkurra þingmanna Miðflokksins og Flokks fólksins sem látin voru falla á Klausturbar 20. nóvember síðastliðin náðust á upptöku og voru birt.

Bergþór Ólason þingmaður Miðflokksins gerði útlit bæjarstjórans Írisar Róbertsdóttur að umfjöllunarefni sínu á fundi þingmannanna þar sem setið var að sumbli. „Hún er miklu minna hot í ár en hún var bara fyrir tveimur árum síðan,“ var á meðal þess sem Bergþór lét út úr sér á barnum.

Sjá nánar: Bergþóri fannst bæjarstjórinn í Vestmannaeyjum „miklu minna hot í ár“

Aðspurð hvort hún hefði fengið afsökunarbeiðni segist Íris ekki hafa heyrt frá neinum sem áttu í hlut á Klausturbar.

„Ég þekki Bergþór ekki neitt,“ segir Íris sem að vonum var hissa á þessari framkomu.

Bergþór Ólason og Karl Gauti Hjaltason fyrrverandi þingmaður Flokks fólksins, sem einnig tók þátt í samtalinu á barnum, eru nefndarmenn í Umhverfis-og samgöngunefnd Alþingis en í gær var Íris gestur nefndarinnar en þá voru þeir Bergþór og Karl Gauti fjarverandi.

„Ég var að fylgja eftir umsögn okkar um samgönguáætlun. Þegar ég kem inn þá er hann ekki þar og ekki Karl Gauti heldur,“ segir Íris. Það var ekki upplýst á fundinum hvers vegna þeir voru ekki þar.

„Ég náttúrulega vissi hverjir væru í nefndinni, ég var búin að kynna mér það. Þetta var mjög fínn fundur og gott að geta fengið að fylgja umsögninni eftir, því ég kom í þeim erindagjörðum til Reykjavíkur. Það hittist nú bara þannig á að þessi umfjöllun var þennan dag,“ segir Íris en umsögnin varðar ýmsa hluti sem snúa að flugvellinum og Landeyjarhöfn.

„Ég trúi því að þessi nefnd starfi faglega og taki faglega á okkar umsögnum eins og öllum öðrum umsögnum,“ segir Íris.

Hún segist ekki vilja draga neinar ályktanir um stöðuna í stjórnmálum út frá ummælunum sem náðust á barnum.

„Mér finnst þetta segja allt um þessa einstaklinga sem þátt tóku í þessum fundi. Þeirra hegðun, eins og hún var þarna, og þetta orðfæri er bara þeirra. Ég ætla ekki að draga ályktun af því. Orðum fylgja ábyrgð og þetta er bara þeirra,“ segir Íris sem bendir á að ummælin sem snúa að henni sjálfri sem og allt illa umtalið í heild sinni sé þingmönnunum sjálfum til skammar.