25 milljarða arður til hluthafa Arion banka

Á hluthafafundi Arion banka hf. sem fram fór í dag var ákveðið að greiða 25 milljarða króna í arð til hluthafa bankans.

Þá var ákveðið að taka upp í samþykktir bankans tímabundna heimild til handa stjórn bankans til að kaupa til baka hlutabréf sem útgefin eru í bankanum að heildarhámarki allt að tíu prósent af skráðum og fullgreiddum hlutum sem útgefnir hafa verið af Arion banka.

Arðgreiðslan er háð þeim skilyrðum að Kaupskil ehf., dótturfélag kaupþings, hafi selt minnst tveggja prósenta hlut í Arion banka eigi síðar en 15. apríl næstkomandi.

Í samræmi við langtímamarkmið bankans

Í tilkynningu Arion banka til Kauphallar segir að arðgreiðslan og kaup á eigin bréfum sé að fullu í samræmi við langtímamarkmið Arion banka um að minkna umfram eigið fé bankans. Að framkvæmdinin lokinin lækkar eiginfjárhlutfall bankans um ríflega 3% en er engu að síður vel umfram kröfur FME og það sem bankinn telur hæfilegt, að því er segir í tilkynningunni.

Greint var frá því í Fréttablaðinu í morgun að ekkert verði af kaupum íslenskra lífeyrissjóða á hlut í Arion banka fyrir útboð og skráningu bankans síðar á árinu.

Hafa allir sjóðirnir, en tólf þeirra höfðu samþykkt að fara í óskuldbindandi viðræður við Kaupþing um kaup á tæplega tíu prósenta hlut, tekið ákvörðun um að fjárfesta ekki í bankanum áður en ársuppgjör hans verður birt næstkomandi miðvikudag, samkvæmt heimildum Fréttablaðsins.