Hörður Björgvin kvaddi Bristol City á Twitter

Landsliðsmaðurinn Hörður Björgvin Magnússon er á förum frá enska B-deildarliðinu Bristol City eftir að hafa samið við rússneska stórveldið CSKA Moskva.

Hörður Björgvin gekk í raðir Bristol árið 2016 og hefur leikið 61 leik fyrir félagið síðan þá. Hann kvaddi félagið með kveðju á Twitter síðu sinni í gær.

„Ég hef átt frábæran tíma hérna og eignast fullt af góðum minningum. Besta stundin var þegar þið sköpuðuð ótrúlegt andrúmsloft í leiknum gegn Man Utd á Ashton Gate.“

„Þið hafið verið ótrúlegir. Ég mun halda áfram að fylgjast með félaginu og vona að þið komist upp í úrvalsdeildina," er meðal þess sem Hörður segir en færsluna má sjá í heild sinni hér fyrir neðan.

Hörður Björgvin er 25 ára gamall uppalinn Framari sem gekk ungur í raðir Juventus á Ítalíu en var lánaður þaðan til Spezia og Cesena á Ítalíu áður en hann færði sig til Bristol á Englandi.

Hann mun flytjast til rússnesku höfuðborgarinnar þegar Heimsmeistarakeppninni þar í landi lýkur og hefja æfingar með CSKA sem hefur þrettán sinnum orðið rússneskur meistari.