„Þessi verk voru unnin“

Sigurður Ragnar Kristinsson þarf einn að svara til saka fyrir meint meiriháttar skattalagabrot í rekstri verktakafyrirtæksins SS verks ehf. eftir að saksóknari ákvað að falla frá ákærum á hendur fyrrverandi tengdamóður Sigurðar og undirmanni hans. Grunur lék á að hin umræddu skattsvik þeirra Sigurðar, Unnar Birgisdóttur og Armando Luiz Rodriguez næmi tæpum 105 milljónum króna.

Við upphaf aðalmeðferðar málsins í Héraðsdómi Reykjaness í dag sagði saksóknarinn, Finnur Þór Vilhjálmsson, að ný gögn hefðu borist ákæruvaldinu sem væru þess eðlis að óhjákvæmilegt væri að afturkalla ákæruna á hendur Unni og Armando - til þess að rannska megi tiltekna þætti málsins betur. Að því búnu verði svo metið hvort að höfða beri nýtt mál á hendur þeim. Við þetta gerðu verjendur þeirra Unnar og Armando engar athugasemdir en kröfðust málsóknarlauna úr ríkissjóði áður en þeir yfirgáfu salinn.

Sjá einnig: Ákærður fyrir 50 milljón króna skattsvik

Sigurður sat því einn fyrir svörum í dómsal í dag, en honum er gefið að sök að fyrir að hafa staðið skil á röngum virðisaukaskattsskýrslum. Það á hann að hafa gert með því að hafa oftalið innskatt um tæpar 34 milljónir króna á grundvelli fimm tilhæfulausra sölureikninga, gerða út á fyrirtækið TG smíðar sem nú er gjaldþrota. Auk þess er Sigurður talinn hafa vanframtalið virðisauka SS verks ehf. um tæpar þrjátíu milljónir króna.

Þá var Sigurður einnig ákærður fyrir að hafa ekki staðið skil á rúmum 15 milljónum króna í staðgreiðslu opinberra gjalda sem haldið var eftir af launum starfsmanna SS verks. Litlu púðri var hins vegar varið í að ræða þennan þátt málsins, enda hefur Sigurður áður gengist við þessum brotum sínum. Aðspurður um hvort að hann hefði í hyggju að afturkalla játningu sína sagði Sigurður að það stæði ekki til. Hann aðeins ítrekaði skýringar sínar; allt hafi verið reynt til að halda fyrirtækinu á lífi á erfiðum tíma í rekstrinum. Ásetningurinn til lögbrots hafi ekki verið til staðar - „en svo fór sem fór.“

Saksóknara gafst því færi á að spyrja Sigurð ítarlega út í sölureikningana sem allt snýst um. Vafi leikur á því hvort að einhver vinna hafi raunverulega legið að baki reikningunum og hvort greitt hafi verið fyrir hana, en SS Verk fékk endurgreiddan virðisaukaskatt af viðskiptunum.

Sjá einnig: 600 milljóna gjaldþrota SS Húsa

Sigurður sagði reikningana vera raunverulega - en skattayfirvöld segja þá tilhæfulausa.

Maðurinn sem grunaður er um að hafa gefið út reikningana fyrir hönd TG Smíða, Halldór Hlíðar Bergmundsson, hafði ekkert umboð til þess. Heildarupphæðin sem Halldór er sagður hafa rukkað nam 170 milljónum króna og af máli saksóknara mátti skilja að enginn þessara reikninga hafi verið greiddur með „hefðbundnum hætti,“ eins og með færslu í heimabanka, heldur á greiðslan að hafa farið fram með vinnuskiptum.

Þrátt fyrir að upphæðin kynni að hljóma há sagði Sigurður að á hana verði að líta í samanburði við heildarveltu fyrirtækasamsteypunnar, sem nam milljörðum króna. Umræddar milljónir til TG Smíða séu ekki sérstaklega háar í heildarsamhenginu og því hefðu þær ekkert endilega átt að vekja neinar sérstakar grunsemdir hjá sér.

„Með fullri virðingu fyrir skattrannsóknarstjóra þá dró hann ályktanir sínar út frá því að þetta væru háar upphæðir en hann var ekki tilbúinn að horfa á alla starfsemi félagsins. Þetta eru ekki nema örfá prósent af veltu félagasamsteypunnar,“ sagði Sigurður og bætti við:

„Sannanirnar eru engar, enda fer ég með rétt mál. Þessi verk voru unnin.“

Þá vandaði Sigurður Halldóri Hlíðar ekki kveðjurnar. Hann sagðist hafa heyrt að Halldór „væri ekki alveg heiðarlegur í sínu starfi“ og að honum hafi þótti Halldór „flóttalegur“ í samskiptum þeirra. Þrátt fyrir það hefði Halldór ætíð skilað af sér umræddum verkum. Sigurður sagði að það væri því „alveg fráleitt af Halldóri að hlaupa svona til baka,“ þegar honum var tjáð að Halldór sagðist í skýrslutöku ekkert kannast við að hafa gefið út tvo reikninga.

Saksóknarinn bað Sigurð að útskýra hinn tilfinnanlega skort á gögnum sem útskýrt gætu hvaða vinnu Halldór og TG Smíðar inntu raunverulega af hendi fyrir SS Verk. „Kaupin á þessari eyri eru svolítið mikið á hlaupum,“ sagði Sigurður. „Það er ekkert óeðlilegt við það að það séu ekki endilega undirritaðir samningar við alla undirverktaka, hvorki við þennan né aðra,“ sagði hann ennfremur og bætti við:

„Þau gögn sem liggja fyrir í málinu eru þau gögn sem eru til.“

Grunur um skjalafals

Að skýrslutökunni lokinni yfirgaf Sigurður salinn og hringt var í þáverandi eiganda TG Smíða. Svör hans voru afdráttarlaus. Hann hafi aldrei gefið út umrædda reikninga og hann hafi ekkert fengið greitt fyrir þá. „Ég vissi fyrst af þessum reikningum þegar ég var kallaður til skýrslutöku hjá skattrannsóknarstjóra.“

Hann sagðist ekki vera fullviss um hver það var sem gaf út reikninga í nafni fyrirtækisins - „en mig grunar að Halldór hafi gert það.“

Til stóð að taka skýrslu af Halldóri Hlíðar í dag en hann mætti ekki, þrátt fyrir ítrekaðar beiðnir réttarins.