Magnaðar seinni níu og Haraldur í fínni stöðu fyrir morgundaginn

Haraldur Franklín Magnús, atvinnukylfingur úr GR, hóf í dag leik á Opna mótinu og varð þar með fyrsti íslenski karlkylfingurinn til að leika á einu af risamótunum fjórum. Haraldur lék fyrsta hringinn á höggi yfir pari og er þessa stundina jafn í 67. sæti en margir kylfingar eiga eftir að ljúka leik í dag.

Haraldur hóf leik á 1. teig í morgun og fór ekki alveg nógu vel af stað. Hann fékk þrjá skolla á fyrstu 8 holunum og allir komu þeir eftir að hann hafði slegið í glompu í upphafshöggunum. Því næst fékk Haraldur skolla á 9. holu þar sem hann fór illa með gott fuglafæri.

Á seinni níu setti Haraldur svo í fluggír og var strax kominn með þrjá fugla eftir holur 10-14. Þar með var hann kominn á högg yfir par í heildina og fjórar holur eftir.

Skollar á 15. og 16. holu komu Haraldi aftur á 3 högg yfir pari en þar með var sagan ekki öll sögð því hann fékk magnaðan fugl á 17. holu áður en fékk enn betri fugl á 18. holu.

Haraldur er sem fyrr segir jafn í 67. sæti en hann er í góðum félagsskap þar með kylfingum á borð við Jordan Spieth, Justin Rose og Louis Oosthuizen sem allir léku á höggi yfir pari í dag.

Annar hringur mótsins fer fram á morgun en eftir hann verður skorið niður. Þá komast um 70 efstu kylfingarnir áfram og er því Haraldur í fínni stöðu fyrir framhaldið.

Hér er hægt að sjá stöðuna í mótinu.

Hér að neðan másjá með textalýsingu blaðamanns Vísis sem fylgdi eftir hverju höggi Haraldar með aðstoð Þorsteins Hallgrímssonar, sérfræðings Golfstöðvarinnar, sem fór með Haraldi allan hringinn.