TM vill kaupa Lykil fyrir 10,6 milljarða

Tryggingamiðstöðin hefur lagt fram skuldbindandi kauptilboð í alla hluti í Lykli fjármögnun hf. Kauptilboðið nemur 10,6 milljörðum.

Þetta kemur fram í tilkynningu TM til Kauphallarinnar sem send var út í kvöld. Þar segir að á grundvelli tilboðsins hafi seljandi, Klakki hf., ákveðið að hefja einkaviðræður við TM um kaup á Lykli fjármögnun hf.

Lykill er fjármögnunarfyrirtæki sem lánar til fyrirtækja og einstaklinga fyrir kaupum þeirra á bílum, vélum og tækjum. Í tilkynningunni segir að í árslok 2017 hafi eigið fé Lykils verið 13 milljarðar og heildareignir tæpir 32 milljarðar.

„Kauptilboðið nemur 10,6 milljörðum króna og er háð ýmsum fyrirvörum, svo sem um áreiðanleikakönnun og niðurstöðu hennar, samþykki Fjármálaeftirlitsins um að TM megi fara með virkan eignarhlut í hinu selda félagi og að Samkeppniseftirlitið samþykki hið nýja eignarhald,“ segir í tilkynningunni.