Funda vegna stefnu Trumps

Afstaða íslenskra stjórnvalda er skýr í garð þeirrar framkvæmdar bandarískra stjórnvalda að aðskilja börn ólöglegra innflytjenda frá fjölskyldum sínum. Þetta segir Guðlaugur Þór Þórðarson utanríkisráðherra. Óskað hefur verið eftir fundi í utanríkismálanefnd þingsins vegna málsins.

Undanfarnar vikur hafa ríflega tvö þúsund börn verið fjarlægð úr fangi foreldra sinna við komuna til Bandaríkjanna. Um börn ólöglegra innflytjenda er að ræða. Er þetta gert á meðan foreldrar þeirra eru saksóttir fyrir brot sitt.

„Miðað við þær fréttir sem ég hef séð þá samræmist þetta ekki þeim gildum sem við aðhyllumst um að réttindi barna séu ávallt í fyrirrúmi,“ segir Guðlaugur. „Við erum ekki ein um þá skoðun. Til að mynda hafa allar núlifandi forsetafrúr Bandaríkjanna gagnrýnt þetta.“

Ráðherrann bendir á að innflytjendamál hafi lengi verið þrætuepli í Bandaríkjunum og að í forsetatíð Obama hafi fólki verið haldið nauðugu við landamærin. Þá hafi fjölskyldur þó verið saman.

„Það liggur alveg skýrt fyrir hver afstaða íslenskra stjórnvalda er og við munum koma þeim sjónarmiðum á framfæri. Ég vil trúa því að úr þessu leysist,“ segir Guðlaugur.

Sjá einnig: Vilja að Ísland fordæmi harðræði Bandaríkjanna gagnvart flóttabörnum

Logi Már Einarsson, þingmaður Samfylkingarinnar, óskaði í fyrrakvöld eftir fundi utanríkismálanefndar vegna málsins. Stefnt er að því að fundurinn fari fram í upphafi næstu viku en nefndarmenn eru margir hverjir á erlendri grund sem stendur á vegum þingsins.

„Ég tel röksemdir og skýringar yfirvalda og forsetans vestanhafs fyrir þessum ömurlegu aðgerðum vera mjög ótrúverðugar. Þær eru harkalegar og bitna á þeim sem síst skyldi,“ segir Áslaug Arna Sigurbjörnsdóttir formaður utanríkismálanefndar.

Áslaug segir að íslensk stjórnvöld geti ekki haft bein áhrif á það sem gerist innan landamæra Bandaríkjanna en segir að Ísland eigi að gera þá kröfu til stjórnvalda ytra að þau sýni mannúð og virðingu.

„Ég reikna með að leggja til á fundinum, ef ríkisstjórnin ætlar ekki að álykta og fordæma þessa framkvæmd, að þá geri nefndin það. Þetta er fráleitt sem er að gerast vestra,“ segir Logi.

Logi segir óhuggulegt að fylgjast með því að lítil börn séu notuð sem skiptimynt í deilum milli Repúblikana og Demókrata um fjármagn til mannvirkis sem sé „líka ljótt“. „Þetta er fordæmalaust og skelfir mann. Það er margt sem íslensk þjóð getur gert til að láta gott af sér leiða,“ segir Logi.

Rósa Björk Brynjólfsdóttir, þingmaður Vinstri grænna og varaformaður utanríkismálanefndar, tekur í sama streng og Logi.

„Þetta er ómannúðleg framkoma og vanvirðing við börn, mannréttindi þeirra og fjölskyldur í afar viðkvæmri stöðu. Að mínu mati verða bandarísk stjórnvöld að snúa strax af þessari leið að nota saklaus börn sem skiptimynt í umræðum um byggingu landamæraveggs,“ segir Rósa.

Rósa bendir á að sem stendur sé Ísland að sækja um stöðu í barnaréttarnefnd Sameinuðu þjóðanna. Sem slíku beri Íslandi að koma á framfæri sinni skoðun þegar í ljós kemur slíkt framferði gegn börnum í þessari stöðu.

„Ef málefnin eiga að ráða för í slíku framboði þá eigum við að kveða svolítið hart að orði,“ segir Rósa.