25 laxar á land við opnun Miðfjarðarár

Miðfjarðará opnaði á föstudaginn og skilyrðin þar voru afar erfið en hitastigið var aðeins um 3-4 gráður mestan part dagsins.

Þrátt fyrir kuldann fer veiðin afar vel af stað í Miðfjarðará en alls var 25 löxum landað á þessum fyrsta degi og töluvert líf var að sjá í ánni.  Allir laxarnir sem komu á land þennan fyrsta dag voru á milli 80 og 90 sm langir svo það gæti verið að stefna í annað gott stórlaxaár í ánni.  Heildarveiðin í Miðfjarðará í fyrrasumar var 3.765 laxar en frá árinu 2009 þegar það vieddust 4.004 laxar hefur veiðin aðeins tvisvar farið undir 2.000 löxum en það var árið 2012 þegar það veiddust 1.610 laxar og síðan 2014 þegar það komu 1.694 laxar á land.  Mesta veiðin í ánni var 2015 þegar 6.028 laxar veiddust í henni.