Trollkúlur öðlast nýtt líf

Hafsteinn Rúnar, Ragnar Geir, Ragnar Þór, Sigurður Örn og Viktor Andri eru allir vinir á lokaári í Verzlunarskóla Íslands og stefna á útskrift 26. maí næstkomandi. Nú vinna þeir að frumkvöðlaverkefni sem styður við átak Landverndar Hreinsum Ísland.

„Allir viðskiptabekkirnir í skólanum fara í frumkvöðlafræðiáfanga á síðustu önninni og taka þátt í fyrirtækjasmiðju JÁ Iceland,“ segir Hafsteinn Rúnar Jónsson í samtali við Vísi.

„Við erum að búa til nýtískulega hönnunarvöru úr trollkúlum sem við fjarlægum úr fjörum Reykjanesskaga. Við málum trollkúlurnar svarbláar og Lilja Cardew, upprennandi listakona, málar síðan stjörnur og stjörnumerki á kúlurnar.“

Hann segir að stjörnurnar séu málaðar á með sjálflýsandi efni og því lýsa þær í myrkri.

„Kúlurnar eru mis veðraðar og handmálaðar af Lilju Cardew sem gerir vöruna mjög persónulega. Tómas Knútsson í Bláa hernum hjálpaði okkur mikið við að hreinsa fjörurnar og safna trollkúlum. Tómas vinnur gott og mikilvægt starf til að sinna umhverfinu á Íslandi.“

Hann segir að hópurinn hafi fengið hugmyndina af vörunni á fyrirlestur frá Þóri Sigfússyni, stofnanda og stjórnarformanni Íslenska Sjávarklasans. 

„Það er gífurlegt magn af plasti og rusli í sjónum okkar og fjörurnar eru margar stútfullar af drasli, sem er sorglegt. Því er spáð að árið 2050 verði meira plast í sjónum en fiskar, ef farið er eftir þyngd. Þetta er til að mynda mjög slæmt fyrir dýralíf í kringum sjóinn og fuglar geta auðveldlega fest sig í plasti eða öðru drasli og slasað sig. Megintilgangur og markmið starfseminnar okkar er að stuðla að umhverfisvernd. Algengt er að plast, sem hægt væri að endurnýta, sé grafið ofan í jörðina en við viljum frekar nýta plastið á skapandi hátt. Plastið er í raun verðmæti og það er því óþarfa sóun að farga því með þeim óumhverfisvæna hætti að grafa það.“