Innlent

Bragi í leyfi frá Barna­verndar­stofu

Sylvía Rut Sigfúsdóttir skrifar
Bragi Guðbrandsson, forstjóri Barnaverndarstofu.
Bragi Guðbrandsson, forstjóri Barnaverndarstofu. vísir/valli

Ríkisstjórnin samþykkti á fundi sínum í morgun að sækjast eftir sæti fyrir Íslands hönd í Barnaréttarnefnd Sameinuðu þjóðanna. Bragi Guðbrandsson forstjóri Barnaverndarstofu verður í kjöri til nefndarinnar en í henni sitja 18 sérfræðingar og hafa þeir það hlutverk að fylgjast með framkvæmd Barnasáttmála Sameinuðu þjóðanna. 

Segir í tilkynningunni að staða Braga sem frambjóðanda Íslands sé sterk vegna áratuga reynslu hans af málaflokknum og þátttöku í alþjóðlegu samstarfi á þessu sviði.

Utanríkisráðuneytið stýrir kosningabaráttunni
Samkvæmt tilkynningu frá Velferðarráðuneytinu hefur Ásmundur Einar Daðason, félags- og jafnréttismálaráðherra, veitt Braga leyfi til eins árs frá embætti forstjóra Barnaverndarstofu. Nái Bragi kjöri lætur hann af embætti sínu sem forstjóri Barnaverndarstofu þar sem áhersla er lögð á að nefndarmenn séu óháðir barnaverndaryfirvöldum í einstökum ríkjum Sameinuðu þjóðanna.

„Samhliða undirbúningi vegna framboðs síns mun Bragi sinna afmörkuðum verkefnum í velferðarráðuneytinu sem snúa að tilteknum áherslumálum ráðherra í málefnum barna samkvæmt samningi þar að lútandi. Er þar einkum horft til þess að tryggja börnum og fjölskyldum þeirra sem skjótasta íhlutun og stuðla að heildstæðri nálgun og samfellu þjónustunnar þannig að hún mæti sem best þörfum barna og fjölskyldna hverju sinni,” segir í tilkynningunni.

Fresturinn til að skila inn framboði rennur út í lok apríl en hingað til hefur ekkert Norðurlandanna skilað inn framboði. Kirsten Sandberg, lögfræðingur og sérfræðingur í réttindum barna frá Noregi, hefur setið í nefndinni í átta ár en gefur ekki kost á sér áfram. 

Kosið er í nefndina á tveggja ára fresti, níu fulltrúar í senn. Hver fulltrúi er kosinn til fjögurra ára. Næsta val fer fram þann 29. júní næstkomandi og mun Utanríkisráðuneytið stýra kosningabaráttu vegna framboðs fulltrúa Íslands með milligöngu fastanefndarinnar í New York.

Ætla að endurheimta traust
Ásmundur Einar kynnti í dag breytingar á sviði barnaverndar hér á landi. Ráðherra segir að fyrirhugaðar breytingar á sviði  barnaverndar séu að hluta til liður í viðbrögðum ráðuneytisins til að endurheimta traust í kjölfar fyrrnefndra umkvartana en þeim sé einnig ætlað að bæta stjórnsýslu málaflokksins og stuðla að þróun nýrra úrræða í barnavernd.

Í tilkynningu um breytingarnar kom fram að Bragi myndi á næstunni vinna að verkefnum sem þessu tengjast á grundvelli samkomulags sem gert hefði verið á milli hans og Velferðarráðuneytisins.


Tengdar fréttir

Sigríður Jónsdóttir metin hæfust

Ásmundur Einar Daðason, félags- og jafnréttismálaráðherra, hefur skipað Sigríði Jónsdóttur, sérfræðing í velferðarráðuneytinu, til að fara með stjórn nýrrar gæða- og eftirlitsstofnunar á sviði félagsþjónustu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.