39 ára gamall maður var dæmdur í undirrétti í Östersund í Svíþjóð í 14 ára fangelsi fyrir að hafa pantað nauðganir á börnum á Filippseyjum í 32 skipti á árunum 2011 til 2016.

Um er að ræða filippseysk börn undir níu ára aldri, ungbörn þar með talin. Hann var jafnframt dæmdur fyrir annað gróft kynferðislegt ofbeldi gegn börnum.

Maðurinn sagði til um framkvæmd ofbeldisins í gegnum netið og vefmyndavél. Hann tók myndskeið af því þegar börnunum var nauðgað og vistaði þau í tölvu sinni.

Maðurinn var einnig dæmdur fyrir vörslu barnakláms. Talið er að hann hafi greitt mæðrum barnanna fyrir að beita þau kynferðislegu ofbeldi samkvæmt fyrirmælum hans.

Þá hafði hinn dæmdi komið fyrir myndavélum á salernum í Östersund til að taka myndir af notendum þeirra.