Ásmundur Friðriksson fékk ekki krónu frá Ingva Hrafni

Fjölmargir velta nú vöngum yfir hinni miklu keyrslu sem hefur verið á Ásmundi Friðrikssyni þingmanni Sjálfstæðisflokksins en hann fékk 4,3 milljónir endurgreiddar frá þinginu vegna aksturs í fyrra. Ásmundur skilur gagnrýnina en er hvergi nærri af baki dottinn.

Ásmundur fékk ekki krónu frá ÍNN

Einn er sá maður sem telur þetta ekki mikið og hann heitir Ingvi Hrafn Jónsson, fyrrum sjónvarpsstjóri ÍNN en Ásmundur var með reglulega þætti á dagskrá sjónvarpsstöðvarinnar í fyrra. Spurt er hvort Ingvi Hrafn hafi pungað út vegna kostnaðar við ferðir Ásmundar við þá dagskrárgerð?

Audlindakistan_19APR17 from inntv on Vimeo.

„Aldrei krónu,“ segir Ingvi Hrafn harðákveðinn. Ásmundur fékk hvorki greiddan kostnað vegna þeirrar dagskrárgerðar né greitt fyrir dagskrárgerðina sem slíka.

En, má þá skilja þetta svo að þingið hafi verið að greiða þann kostnað – óbeint að borga fyrir dagskrárgerð á ÍNN?

„Þetta var ekki þannig. Nú veit ég ekki eftir hverju þú ert að slægjast? En, þetta var þannig að tæknimaður ÍNN hann elti Ása. Það var ekki þannig að ríkið væri að borga eitt né neitt. Það var ákveðið að hann yrði staddur í kjördæminu þennan dag, langaði til að taka þetta, tók stundum tvo eða þrjá þætti í ferðinni, og tæknistjórinn hitti hann þar sem var ákveðið.“

Ekkert hankí pankí

Ingvi Hrafn vill meina að Ásmundur hafi ekki verið á sínum vegum.

„Við nutum þess þegar hann var í kjördæminu sínu, hann leyfði okkur að njóta þess efnis, byggt á minni hvatningu til hans; okkur vantar innlent efni. Leyfðu okkur að njóta þess þegar þú ert á þessum ferðum. Ekkert hankí pankí.“

Ingvi Hrafn segir það nýjasta að nú ætli Ásmundur að ganga kjördæmi sitt á enda, sem er ekki lítið, frá Vatnsleysuströnd til Hafnar í Hornafirði.

Hann þarf varla mikið bensín í það?

„Neinei. Neineni, en hann er að taka þetta í 10 til 15 km áföngum. Þessi gæi er kominn frammúr fimm sex á morgnana. Hitta karlana á vigtinni, setja á stokk endurvinnslu fyrir fatlaða... hann er allstaðar. Ef einhverjir væru að reyna að koma einhverjum sögum á flot eru það þeir sem öfunda hann af dugnaðinum. En Ása er allstaðar vel tekið, jafnt af kommúnistum sem íhaldsmönnum. Hann ofdekrar kjósendur sína.“

Verið að refsa honum fyrir dugnaðinn

Ingvi Hrafn er reyndar á því að umræðan vegna kostnaðar við ferðir Ásmundar um landið sé blöskranleg.

„Ég hef fylgst með þingstörfum í 40 ár og fylgst vel með pólitík. Ég hef aldrei fyrirhitt þingmann sem er jafn duglegur og víðförull um þetta kjördæmi sitt og Ásmundur Friðriksson. Það kostar að keyra kjördæmið, og nú er verið að núa karlræflinum því um nasir að hann sé svona duglegur! Sakaður um óheiðarleika. Ef þetta er ekki íslenskt, þá veit ég ekki hvað það er.“

Ingvi Hrafn bendir á að Ásmundur hefði getað leigt bíl en hann kaus að aka á sínum eigin bíl samkvæmt akstursdagbók. Strangheiðarlegur.

„Ég fullyrði að hann rukkar ekki íslenska skattgreiðendur um krónu umfram það sem þetta kostar.“