Uppreisnarverðlaunin veitt í fyrsta sinn

Uppreisnarverðlaunin voru veitt í fyrsta sinn í gærkvöldi. Uppreisn, ungliðahreyfing Viðreisnar, veitir verðlaunin sem þakklætisvott í garð þeirra sem hafa skarað fram úr í markverðu og óeigingjörnu starfi í þágu frjálslyndis og almannahagsmuna.

Verðlaunin eru veitt í tvennu lagi. Annars vegar til einstaklings og hins vegar til hóps. Einstaklingsverðlaunin voru veitt Benedikt Jóhannessyni, fyrrverandi fjármálaráðherra. 

Að mati stjórnar Uppreisnar lyfti Benedikt grettistaki þegar hann stofnaði stjórnmálaflokk, sem hvort tveggja var byggður á grundvelli frjálslyndrar hugsjónar og hafði „almannahagsmuni framar sérhagsmunum“ að einkennisorðum.

Hópurinn sem hlaut Uppreisnarverðlaunin 2018 var Frú Ragnheiður –skaðaminnkun. Í tilkynningu frá Uppreisn segir að Frú Ragnheiður hafi með starfi sínu bjargað mannslífum, aukið öryggi fólks notar vímuefni í æð og staðið að fræðslu um jaðarsetta hópa. 

Svala Jóhannesdóttir, verkefnastjóri Frú Ragnheiðar, tók á móti verðlaununum fyrir hönd verkefnisins. Hún vinnur, ásamt hópi sjálfboðaliða, að lýðheilsustarfi sem Frú Ragnheiður sinnir. 

Stjórn Uppreisnar vonar að verðlaunin muni hvetja fólk til frekari dáða í frjálslyndum málum í þágu almannahagsmuna.